Шоръялысе библиотекыш йоча-влык куандарен коштыт

Кызытсе саманыште сылнымут литературым лудшо икшывым шуэн вашлият. Ындыжым нунын йӧратыме занятийышт – планшет, смартфон, компьютер модыш-влак. Шагат дене кажне кечын экраныш тӱкнен шинчат. А вара ача ден ава-влак ӧрыт – молан нунын икшывышт вашке сырышан?

Мый кызытат шарнем, мыланна визымше классыште Валентин Катаевын «Сын полка» повестьше почеш художественный фильмым ончыктышт. Тудым ончымо деч вара мылам шкаланем книгам лудмем шуо. Ялыште библиотекыш куржым. Тиде книгаже тыште лийын огыл, тудым чыланат лудыныт.

– Тый 36-шо лият, – каласыш мыланем ялысе библиотекарь Степан Шабакаевич Шабакаев, лӱмын журналыште тӧр почерк дене возыш мыйын фамилиемым. Ноябрь тылзылан мыйын пошкудем деке черет шуо. А нунышт ешыштышт куд тунемше…

Ты чапле жап-влакым шарналтен мый Шоръялысе библиотекыш пуралт лекташ лийым. Тушто йоча-шамычын йӱкыштым кольымат, моткоч куанышым. Икшыве-влак дене палыме лийым. Нуно кугу поэт Мустай Каримын шочмыжлан 100 ий теммылан лӱмдалтше онлайн-конкурсышто участвоватлаш ямдылалтыт. Мо вара тугай онлайн-конкурс? Мыйын гае тиде мутым палыдыме еҥ-влаклан умыландараш тыршем: ӱдыр-влак почеламутым лудыт, а нуным видеош сниматлат да ты роликым конкурс комиссийыш колтат.

Мый нунын дене шке конкурсемым эртарышым. Тиде конкурс «Калтаса ӱжара» газетын призшылан.

Чыланат Мустай Каримын «Я – россиянин» почеламутшым лудаш ямдылалтыныт. Вет кажныже тудым шке семынже лудеш. А эн тӱҥжӧ – Мустай Каримын возымо кажне мутышкыжо ӱдыр-влак шке шижмашыштым, тургыжланымашыштым пыштен лудыныт. Онлайн-конкурсын жюриштыже шинчыше еҥ-влак нунын лудмыштым кузе аклаш тӱҥалыт, мый ом пале. Мый гын, кажныжлан призан верым пуышым. Приз ден Диплом чылаштланат лиеш. Тольык «Калтаса ӱжара» газет деч.