«Победа» ООО-што кызытсе жаплан келшен толшо вольыкым ончымо комплексыште паша шолеш

Тений эше кеҥеж покшелне ты верыште яра пасу шоген. Качкин-Турай да Торасола ял-влак коклаште кызытсе жаплан келшен толшо вольыкым ончымо комплексым, Уфа-Янаул республике корно воктене, эше эртыше ийын август тылзын ышташ тӱҥалыныт. Тушто 1200 вуй ушкалым ашнаш палемдалтеш.

Ончыкылык комплекслан фундаментыш символ сынан ший оксам пыштыме годым БР ялозанлык министр Ильшат Ильдусович Фазрахманов каласен:

– Ты верыште кызытсе жаплан келшен толшо вольыкым ончымо комплексым чоҥымо лиеш. Кузе ме ужына – ончыкылык объектым чоҥаш чыла велымат сай мланде участкым ойырен налме: кугыжаныш экспертизе деч сай заключенийым, чоҥаш разрешенийым налме, планировко шотышто пашам шуктымо, подряд да оборудованийым кондымо шотышто договор-влакым ыштыме.

Нине мут-влакым чоҥаш тӱҥалме деч ончыч каласыме лийын. Тачысе кечылан объект территорийыштыже паша шолеш. «Сельстрой» ООО подрядчик уда огыл темп дене да сайын пашам шукта. Сандене ончыкылык комплекс территорийыште кажне вӱргечын тыште заказчик ден подрядчикын погынымашыже эрта.

Эртыше арнян паша дене тыште район администраций вуйлатыше Юрий Минзарипович Садыров лийын. Тыште паша нерген мутланымаш миен. Ты жаплан тӱҥ корпусын зданийже пашалан ямде улеш. Ушкал-влакым ашнаш чыла условият уло. Кажне ушкалын шке верже. Моло корпуслаште обслуживатлыше пӧлемлаште кӱварым заливатлат, пырдыж-влакым штукатуритлат, тыгак оборудований-влакым монтироватлат. Тӱҥ корпус деч вара фуражым, комбикургым аралыме пӧлем-влакым чоҥымо паша мия. Шудым аралыме верым ямдылыме. Силос вынем-влакат ужар массе дене тич темыныт. Тидым мӱндырчынак ужаш лиеш.

Ик мут дене каласаш гын, чоҥымо паша вашке мучашке лишемеш. Кызытсе жаплан келшен толшо вольыкым ончымо комплексым колтымо дене продукцийым ыштен лукмо да ужалыме нерген шонаш кӱлеш лиеш. А тиде варажым, кызытеш чоҥымо пашам мучашлаш кӱлеш.