У Орьямучаш ял гыч Савелий Миндияров – стритлифтинг дене Российын да БР-ын чемпионжо, нӧлталалтмаште Европын чемпионжо

Райрӱдӧ деч мӱндырнӧ огыл, Орья эҥер воктене, У Оръямучаш ял верланен. Тыглай ял, тыглай еҥ-влак илат. Мемнан районысо кажне ял шке семынже мотор улеш, тушто илыше кажне еҥ ойыртемалтше.

Тиде ялыште Миндияровмыт еш ила: сурт оза Валерий Шакиртанович ден тудын ватыже Алена Геннадьевна. Тиде шуко икшыван еш, нуно вич йочам ончен-куштат. Мый гын тыгай еш-влакым пагалем, сандене, очыни, мый шкежат шуко икшыван ешыште кушкынам.

Но таче мемнан мутна Валерий ден Аленан Савелий эргышт нерген. Ачаж ден аваже тудлан шуэн вашлиялтше лӱмым пуэныт. Тыгай лӱмым нумалше еҥ-влак поро, волян да цельыш шуаш тыршыше улыт.

Савелийлан кызыт латкандаш ий. Тудо Нефтекамск оласе нефтяной колледжыште «Защита в чрезвычайных ситуациях» пӧлкаште тунемеш. Кунам тудо кӧлан тунеммыжым каласыш, мыйын шинча ончылнем вигак неле жапыште полышым ончыктышо спасатель сӱретлалте. Мыйын шонымаште Савелийын чыла миен лектеш да тудо ончыкыжым чыла шотыштат сай пожарный-спасатель лиеш. Вет кызытак тудо виян, пеҥгыде койышан самырык еҥ улеш.

Тыглай, полмезе рвезе индеш класс марте Тошто Оръямучаш школышто тунемын. Сай тунемын. Яллаште чыла огыл рвезе яра жапшым пайдалын эртара. Савелият йолташыже-влак дене шукыж годым тыглай гуляен коштын. Жап эртыме семын тудо шкаланже оҥайым муын. Теве ынде кум ий рвезе пауэрлифтинг да стритлифтинг дене заниматлалтеш. Лудшына-влак чыланат тиде нерген колынат огытыл, докан. Тиде виян айдеме-влакын спортышт. Спортын виян видше. Стритлифтинг – перекладиныште нӧлталалтмаш да пырняште (брусья) отжиматлалтмаш. «Молан вара тый спортын лач тиде кок видшым ойырен нальыч?» манме йодышемлан Савелий тыгерак вашештыш: «Виян да шкалан ӱшанаш тыланымаш мыйым спортын нине видлашкыже кондыш. Тыгак кумдан палыме еҥ-влакын примерышт мыланем сай пример лие. Шоналташ гын, перекладине – эн сай тренажер. Тудо чыла вереат уло. Лач перекладине ден пырняште чыла мышцым качатлаш лиеш. А эше мемнан «Атлеты и моржи» командына уло. Тиде самырык еҥ-влак спорт да моло направлений денат вияҥаш тыршат. Нимогай допинг, наркотик да арака деч посна сеҥымашан да пиалан лияш шонат. Ме шуаралтына, куржталыштына, тренироватлалтына, таҥасымаш-влаклан ямдылалтына, тыгак походлашке коштына, тазалык да таза илышым намийыме нерген лекций-влакым эртарена».

Таче Савелий нӧлталалтмаште спортын мастерже лӱмым налын, стритлифтинг дене Российын да БР-ын чемпионжо улеш. Сентябрь мучаште тудо классике да многоповторный стритлифтингын Россий чемпионатыштыже участвоватлен. Кок икымше верым налын да спорт мастерын норматившым шуктен.

Кугу да келшен илыше еш гыч тыглай рвезе. Тыште йӧратымаш да икте-весе верч тыршымаш эн тӱҥ улыт. Савелий шке шольо-шӱжарже-влаклан гына огыл примерым ончыкта, тыгак кугыеҥ-влакланат. Вет шке илышнам ме шке чоҥена. Могай корно дене каяшат шке ойырен налына. Тренажер заллаште гына чемпион лияш ок лий. Тидлан тыланымаш, шонымаш, тыршымаш да цель кӱлеш.