Ялласе ФАП-влакын куан дене ойгышт

Кодшо арнян Калтаса эмлымверыште «Мемнан районысо ФАП-влак» месячник тӱҥалын. Тудын эртыме жапыште ялласе чыла фельдшер пунктлаште лияш шонат.

Фельдшер-акушер пункт-влак яллаште кеч-кунамат моткоч кӱлешан социльный объектлан шотлалтыныт. Тачат тыгак кӱлешан улыт. ФАП – яллаште шкешотан вашке полыш улеш.

Икымше кечын Калтаса эмлымверын пашаеҥже-влак – старший фельдшер Л.Н. Валтиева, тӱҥ врачын алмаштышыже И. Фаткуллин кум ФАП-те лийыныт – Киябак, Павасола да Васола яллаште.

Тидын годым пӱсӧ йодыш-влакым палемдыме, нуныжым кӱчык жапыште решатлышаш улыт. Мутлан, Павасола фельдшер-акушер пункт 293 еҥым обслуживатла. Тыште пӧлемым ырыктыме шотышто йодыш пӱсӧ лийын кодеш.

Васола ФАП 250 еҥым обслуживатла, тушеч 63 йочам. Тудым пашашке 2016 ийыште колтымо. Тӱҥ йодыш – вӱд уке.

– Мемнан программышкына ялсовет вуйлатыше-влак ушнат гын, пеш сай лиеш ыле. Вет йодыш шуко, нуным чылажымат решатлаш кӱлеш. Ончылно – теле, йӱштӧ толмылан ончылгоч ямдылалташ кӱлеш, – ойла Калтаса эмлымверын тӱҥ врачын алмаштышыже Ильшат Фаткуллин. – Тыгак тышке район калыкымат ушнаш ӱжына. ӧрдыжтӧ ида код. Пырля веле ме чыла пашамат шуктен кертына.