Башкортостан Республикысе МВД-ын оркестрже Калтаса районышто лийын

5 октябрьыште Калтаса селасе Культура пӧртыштӧ «Дни правопорядка» ден «Служба в полиции твой выбор» акций-влак эртыме жапыште ведомствын эстрадно-духовой оркестрже выступатлен.

Залыште полиций пашаеҥ, ветеранмыт, нунын ешышт да музыкым йӧратыше-влак погыненыт ыле. Артист ден ончаш толшо калыкым район администраций вуйлатышын алмаштышыже Алексеева Елена Анатольевна саламлыш да полицийын пашаже кеч-кунамат правам аралымаште кӱлешан да почетан лийын кодеш манын палемдыш.

Тиде порылык акцийын цель ден задачыже нерген пӧлкан вуйлатышыже, полицийын подполковникше Эрнест Ляпустин ойлен. Тыгак тудо ончаш толшо калыклан полицийын пашаже, тудлан кушто тунемаш лийме нерген каласкален. Калыклан элкӧргӧ паша органын службыжо нерген видеороликым ончыктеныт.

Музыкальный коллективым шокшын да йӱкын вашлийыныт. Оркестрын репертуарыштыже классике да патриотический, тыгак джаз да современный эстраде произведений-влак йоҥгеныт. Оркестрын чыла выступленийжым совым рӱж кырен вашлийыныт да ужатеныт.

Жап моткоч писын эртен кайыш, концерт программат мучашке лишеме. Калык кужу жап коллективлан совым рӱж кырыш. Верысе калыклан концерт келшен да сай кумылым ятыр жаплан пӧлеклен.

Э. Салимова