Шукерте огыл илыме-коммуналь озанлык пашаеҥ-влак коклаште эртыше «Профессийыште эн сай» профессиональ мастарлык республике конкурсышто «Краснохолмский шокшо сеть» МУП-ын водоснабжений участкын мастерже Наиль Нафкатович Имамутдинов «Эн сай тракторист-механик» номинацийыште нылымше верым сеҥен налын. Конкурсын финалыштыже зона этапыште республикысе 22 ола ден районласе 80 утла сеҥыше-влак участвоватленыт.
– Таҥасымаш кок тур дене эртен, – каласкала Наиль Нафкатович. – Икымше турышто теорий шинчымашым тергеныт, кокымшышто – практике шинчымашым. Теорий дене йодыш-влак транспортын, технике безопасностьын да пашам аралымашын чыла спектрже дене кылдалтын ыле. Практике – прицеп дене тракторым кондыштарымаш, жапым тергеныт. Чынжым каласаш гын, конкурс неле лийын огыл. Тыгай мероприятийыште мый, содыки, нылымше ий участвоватлем. Зона этапыште, тудыжо Мишкан селаште эртен, тыгаяк заданий-влак лийыныт. Тушто мый тракторист-механик-влак коклаште икымше верым налынам.
Икымше гана Наиль Имамутдинов конкурсышто 2014 ийыште участвоватлен. Тунам тудо Бирскыште эртен, зона этапыште кокымшо верым сеҥен налын. 2017 ийыште республике финалыште, Уфаште, нылымше лийын. Кодший, конкурсын республике этапше Янаулышто эртен, нылымше лийын. Кажне конкурсышто Наиль Нафкатович республикысе эн сай-влак коклашке логалын. Тидыже, конешне, кӱкшӧ профессионализм нерген ойла.
Коммунальщик-влак коклаште профессиональ мастарлык конкурс куд номинаций дене эрта. Тиде – эн сай слесарь-сантехник, котельный оборудованийын операторжо, электромонтер, электрогазосварщик, дворник да тракторист-механик. Тиде коммуналь предприятийлаште тӱҥ да эн кӱлешан профессий-влак улыт. Мастер Имамутдинов икмыняр номинацийыште участвоватлен кертеш, вет чыла профессийыштат тудо мастар улеш.
– Молан тракторист-механик? – йодым мый.
– Тиде профессий дене конкурс мылам оҥайрак чучеш. Да тыште мыйын шинчымаш ден опытемат ятыр уло, – ойла Наиль Нафкатович.
Наиль Имамутдинов Уфасе лесотехнический техникумым тунем лектын, механикын специальностьшым налын. Ту жапыште тунемме заведений-влак чыла палыше специалист-влакым ямдыленыт. Тунемме жапыштак Имамутдинов тракторист, водитель лийын, эше икмыняр пашазе профессийым налын. Тунем лекме деч вара, 2003 ийыште, Наиль Краснохолмский ПУЖКХ-ке пашашке пурен. Тракторист лийын ышташ тӱҥалын. Кок ий ыштымеке, нефтянкыш каен, УБР-те тыршаш тӱҥалын, тудым нылымше разрядан токарьлан буровой оборудованийым олмыктымо цехыш налыныт. Тыште куд ий, УБР-ым петырымешке, тыршен. Адакат ЖКХ сферышке пӧртылын, «Краснохолмский водоканал» ООО-то тракторист лийын тыршаш тӱҥалын. Пелий гыч автомашина дене ышташ тӱҥалын. 2013 ий гыч водоснабжений участкын мастержылан шогалтеныт да тачысе кече марте Наиль Нафкатович тиде должностьышто тырша, кеч предприятий тиде жапыште лӱмжымат, статусшымат вашталтен.
«Краснохолмский шокшо сеть» МУП-то Наиль Нафкатовичын ватыжат – Назиля – тырша. Тудо – предприятийын кассирже улеш. Вате-марий шуко икшыван ача-ава улыт. Кум икшывым ончен-куштат. Эн кугу Зарина ӱдырышт кудымшо классыште тунемеш, Артур – кумшо классыште, Самиралан кок ий, йочасадыш коштеш. Пашаштат, ешыштат Имамутдиновмыт моло-влаклан сай пример лийын кодыт.