Калтаса ужара
+18 °С
Пылан
Все новости
Новости
8 Кылме 2019, 21:00

Калтаса районышто ялозанлык производствышто тыршыше-влак лӱмеш пайрем эртен

Калыкын икоян улмо кечыж вашеш районысо Культура пӧртыштӧ пайрем мероприятий эртен, тыште ялозанлык отрасльыште тыршыше пашаеҥ-влакым саламленыт

Калыкын икоян улмо кечыж вашеш районысо Культура пӧртыштӧ пайрем мероприятий эртен, тыште ялозанлык отрасльыште тыршыше пашаеҥ-влакым саламленыт. Концерт программе-влак Калыкын икоян улмыжлан лӱмдалтыныт лийын, тыгак тыште киндым ончен куштышо ден вольыкым ончышо-влакымат чапландареныт. Тыге пайрем тӱрлӧ тӱсан, оҥай миен лектын.
Тений районышто киндым ончен куштышо-влаклан неле условийыште пашам ышташ логалын. Шошат вараш кодын толын, кеҥежат йӱштӧ да йӱран лийын – пырчан кульура-влак ик тылзе вараш кодын шуыныт. А эше йӱр пашам ышташ эрыкым пуэн огыл. Сандене районышто шурным мланде кылмыктымешке погеныт. Туге гынат чыла поген налыныт, мландеш коден огытыл. Лач тидын нерген ойлен шке саламмутыштыжо район администраций вуйлатыше Ю.М. Садыров: – Начар игечым шотыш налде, киндым ончен куштышо-влак шке задачыштым шуктеныт, шурным тичмашнек поген налыныт, – палемдыш Юрий Минзарипович. – Чапле кинде лектышым налме. Пырче склад ден элеваторлашке 332 тӱжем центнер пырчым колтымо. Ик гектар гыч 18,5 центнер дене поген налме. Тыгак районысо ялозанлык пашаеҥ-влак вольыкланат телым илен лекташлан кургым ситышын ямдыленыт.
Тиде мероприятийыште тыгак паша таҥасымаште сеҥыше озанлык ден механизатор-влакым чапландареныт. Ялозанлык-влак коклаште киндым погымаште «Восход» ялозанлык кооператив (вуйлатыше Низамутдинов Дамир Ангамович) ончылно лийын. Районышто ик эн пеҥгыде озанлык кажне ийын шурным поген налмаште ончылно улеш. Тыгай результатлашке, озанлыкын тӱҥ агрономжо Егор Камитдинович Зайнитдиновын мутшо почеш, чыла технологийым чын шуктен толмылан кӧра шуалтеш. «Восход» СХК чыла тидым шуктен толеш, молан манаш гын, тидлан чыла йӧн уло. Озанлыкын машина да трактор паркше кызытсе жаплан келшен толшо да кугу куатан технике-влак дене пойдаралтын, тений гына, мутлан, «Бюллер» тракторым, тыгак пасулашке минераль ӱяҥдышым шавыше агрегатым налме. Тидлан кӧра тыште чыла пасушко минераль ӱяҥдышым шават.
«Восход» СХК-лан район администраций вуйлатыше Чап грамото ден сеҥышын Кубокшым кучыктен.
Кажне ийын тыгак ончылно улшо-влак коклаште Владислав Петрович Бикмурзинынат кресаньык-фермер озанлыкше улеш. Тений тудлан кокымшо верым пуымо. Районышто тиде озанлыкын курал ӱдымӧ мландыже эн кугу, сандене кинде лектышат тудын кугу. Владислав Петрович шурным погымаште шке участвоватла, сандене комбайн дене тудым нигӧ эртен ок керт. Тиде ганат «2019 ийын уржа-сорлан чемпионжо» йошкар ленте, окса приемий да район администрацийын Чап грамотыжо тудлан логале.
Шурным погымаште сеҥыше озанлык-влак коклашке тений «ИТС-Агро» ООО логалын. Озанлык у гынат, тудо талын вияҥеш.
Тиде кечын наградым тыгак «Победа» ООО-лан пуэныт, тудо кургым погымаште кокымшо верыш лектын. Комбайнер-влак коклаште Бикмурзин дене пырля тыгак «Восход» СХК гыч Алик Александрович Яндимировым да Валерий Яковлевич Яшкиным (Е.С. Яшкина КФО) чапландареныт.
Шурным шупшыктышо водитель ден тракторист-влак коклаште Бикмурзинын кресаньык-фермер озанлыкын водительже Олег Алексеевич Мурсакаев, Ф.А. Шуматбаевын КФО-гыч водитель Юрий Федорович Шуматбаев да Г.А. Биктимиров КФО гыч Геннадий Германович Биктимиров уржа-сорлаште эн сай лийыныт.
Паша таҥасымаште сеҥыше да ялозанлыкыште тыршыше чыла пашаеҥлан районысо самодеятельный коллектив-влак чапле концерт номер-влакым пӧлекленыт. Концерт чылалан келшен, кажне номерлан совым рӱж кыреныт. Тыште шкемын шонымемым каласен кодынем. Иктаж-могай событий але датылан лӱмдалтше мемнан самодеятельный коллектив ден мурызо-влакын концертышт кеч-могай эстраде шӱдыр-влакын концертышт деч ятырлан сайрак улыт. Тушто эре попса да реп. А мемнан дене кажне калыкын – башкир, марий, руш, удмурт, татар – культурыжым ужаш лиеш.