Ковыштам шӧнчалтена

Шыжым чылан ковыштам шӧнчалтат. Икмыняр рецептым тыланда темлена.

Икымше рецепт дене келшышын, ковыштам ужаш-влаклан але олым пырче семын пӱчкедена да 3 литран банкышке темден оптена. Ик литр але литрат пеле наре йӱштӧ вӱдыштӧ 2 кугу пане шӧнчалым шулыктарена да 2 кече леве температуран верыште кучена. Тылеч вара вӱдым изишак ястарен налына, тушто пел стакан сакырым шулыктарена да уэш банкыш темена. Ынде тудым холодильникыш але вес юалге верыш шындена. Икмыняр кече гыч ковышта кочкаш ямде лиеш.

***

Тыгеат ыштен кертыда. Ковыштан икмыняр ӱмбал лышташыжым банке пундашке пыштыза, икмынярым варалан кодыза. Ынде кодшыжым тыгыдын пӱчкедыза да шӧнчал, нӱжымӧ кешыр дене пырля сокшо лекмешке лугыза. Тышкак пытартышлан пӧчыж ден тминым ешарен кертыда. Чыла тидым банкышке чот темден оптыза, ӱмбакше ковышта лышташ-шамычым, вара куэмым пыштыза да иктаж неле наста дене темдал шындыза. Кумшо кечылан ковышта кочкаш ямде лиеш.

***

Тиде рецепт почеш 3 литран банкылан налмаште кӱлыт:

– 1 вуй ковышта,

– 1 кешыр,

– 1 кугу пане шекар,

– там шот дене шӧнчал.

Ковыштам тыгыдын пӱчкедена да, сок лекмешке, кугурак атыш пыштен кормыжтылына. Тыгодым шинчалым изин-изин ешарена. Ковышта шуаш тӱҥалже манын, шекарым пыштена. Ынде кешырым кугу рожан терко гоч колтена да эн пытартышлан пыштена, чыла пырля лугена. Тыгодым теве мом шарныза: тудым темдаш огеш кӱл, уке гын тамле огеш лий. Банкышке ковышта ден кешырым оптымеке, капрон петыртыш дене петырена. Икмыняр жап гыч сок шуко лектеш, эсогыл тӱргоч йогаш тӱҥалеш. Сандене банке йымаке атым шындыман. Тудым жапын-жапын изирак банкыш ястарен налман. Ковыштам пєлемыште 3 кече шинчыктыман. Тиде жапыште тудо шуаш тўҥалеш, садлан банке гыч газым – сероводородым – лукман. Тидлан икымше кечын петыртышым чотрак темдалмат сита. Кокымшо да кумшо кечын банкыште ковыштам кужу кӱзӧ дене пундаш марте суткаште 2-3 гана шуралтыман. Кумшо каслан пуш пытышаш. Тыгодым погынышо сок шуйнылшо лиеш. Но ты шотышто тургыжланыман огыл. Тиде тыгак лийшаш. Кумшо кечын газым лукмеке, тушко банкыш ястарен налме сокым ешарыман да ковыштам холодильникыш але вес юалге верыш шындыман.

***

Тиде рецепт моткочак проста. Ковыштам ужаш-влаклан пӱчкедена да 3 литран банкышке оптена. Ик ужашым пыштена, ӱмбакше кугу рожан терко гоч колтымо кешырым да пӱчкедыме чеснокым оптена. 3 литран банкылан улыжат 1 вуй чеснокым кучылтына. Адакат ужаш-влаклан пӱчкедыме ковыштам, вара кешырым да чеснокым оптена. Тыге, банке теммешке, икмыняр гана ыштена, но тудым чот темден темаш тыршыман огыл. Ынде рассолым ямдылена. Тидлан 1 л вӱдыш 2 кугу пане шӧнчалым курык дене да 150 г шекарым, 100 г 9 %-ан уксусым але 1 кугу пане эссенцийым, 100 г кушкыл ӱйым пыштена да ковышта банкыш опталына.