Павасола ялыште ППМИ программе почеш погынымаш эртен

Тыште конкурсышто участвоватлаш проектым ойырымо шотышто йодышым лончыленыт.

Ялыште ятыр проблеме уло: пӱям эрыкташ да тӱзаташ кӱлеш, Центральный уремысе корным олмыкташ, шӱгарла территорийым печылаш, ялысе клубышто сидений-влакым вашталташ да кеч ик йоча площадкым ышташ кӱлеш. Погынышо-влак чыла йодышым каҥашеныт да шӱгарлам печылаш кӱлмӧ шотышто йодышышто чарналтеныт. Тудлан у да сай печым, изи да кугу капкам ышташ кӱлеш. Кызытеш тиде каҥашыме гына, ял калык ты программыш ушнаш лийын. Ноябрь мучаште але декабрь тӱҥалтыште эше ик погынымашым эртараш кӱлеш лиеш. Тунам инициативный группым сайлат.

– Мыйын шонымаште тыгай шансым колтыман огыл, – ойла Калмиямучаш ялсовет администраций вуйлатыше Маязов Валерий Валентинович. – Чыланат участвоватлат, молан ме вара ӧрдыжтӧ шогышаш улына. Ял калык чыланат чолган участвоватлаш тӱҥалеш гын веле проектым ойырен налаш да илышыш шыҥдараш лиеш. Да эше ик тӱҥ условий уло – ял калык да спонсор деч оксам чумырымаш.

Ушештарена, ППМИ – тиде программе. Тудын почеш республике бюджет гыч субсидийым налын ялым тӱзаташ лиеш. Пырля погынен, каҥашен гына шочмо-кушмо верым вияҥдаш да тӱзаташ лиеш! Теве тидым ял калык раш умылышаш! Погынымаш деч вара залыште погынышо калыкым шушаш пайрем дене самодеятельный композитор, мурызо да поэт, мемнан землякна, Агытан ялын шочшыжо Тимеряев Генадий Николаевич саламлен да шке мурыжо-влакым пӧлеклен. Моткоч сай, кунам мемнан районышто тыгак чапле, творческий еҥ-влак илат, почеламутым, семым возат да йоҥгалтарат.