Лиеш мо Кӧкыш ялыште корно…?

Тиде кечылаште Кӧкыш ялыште ППМИ-те (программа поддержки местных инициатив) участвоватлашлан калык дене вашлиймаш эртыш. Ӱлыл Качмаш ялсовет вуйлатыше И.И. Ижбулатов ял калыкым тиде программе дене палдарыш, тыште кажне ялсовет участвоватлен кертеш манын каласыш. Проектым ял калык шке шонышаш.

Ял клубыш погынышо калык 2020 ийыште ППМИ проектыште участвоватлаш келшыш.

Вес йодыш – конкурсышто участвоватлашлан приоритет программым палемдаш кӱлеш. Кӧкыш ял калык чыланат Куйбышев уремын ужашышкыже да Пушкин уремыш тичмашнек щебеньым опташ кутырен келшышт.

– Нине уремлашке щебеньым опташлан ик миллионат 556 тӱжем теҥге окса кӱлеш. Смета документым ыштыме. Тидлан мыланна республике ик миллион теҥге оксам ойыра. Моло оксам шкаланна кычалаш логалеш. Кажне озанлык гыч ме кок тӱжем теҥге дене погаш лийынна. Тыге ме 150 тӱжем теҥгем погена. Тыгак тиде пашашке спонсор-влакат ушнышаш улыт. Сандене мый, Кӧкыш ялыште шочын-кушшо, но кызыт ӧрдыж кундемлаште илыше-влак дечат тиде пашашке ушнаш йодам. Мыйын шонымаште нуно тидын дене келшат, да кертмышт семын полшат. Тыге, кажне озанлык гыч кок тўжем дене погена, да эше кӧн транспортшо уло, тудо эше ешарен кок тўжемым тӱлышаш, – каласыш погынымаш вуйлатыше Г.А. Биктимиров.

Но тыште шонымаш-влак тӱрлӧ лийын кайышт. Калык тиде йодышым рўжге каҥашаш тӱҥале. Тиде йодыш шотышто погынымашым ончыкыжым эше ик гана эртараш лийыч.

***

Погынымаш деч вара Кӧкыш ял калыкым шке выступленийышт дене «Чолман» газет, «Шӱдыргорно» мурышо ансамбль, Адик ден Ирина Ибакаевмыт, Келтей ял гыч Л. Ислаева, Л. Изимариева да Б. Ибаев куандарышт.