Могай йолчиемым телым чийыман

Российышке мода шокшо элла гыч толеш. Южгунам модыш пурышо йолчием тазалыклан эҥгекым ыштен кертеш. Молан вара телылан келшен толдымо йолчиемым чияш лӱдыкшӧ, тидын нерген врач умылтара.

И.М. Сеченов лӱмеш МГМУ-н медицине реабилитаций отделенийжым вуйлатыше, травматолог-ортопед Константин Терновой каласкала: «Кызытсе кумдан палыме йолчием-влак йӱштӧ игечылан изишат келшен огыт тол, а могайым вара чияш лиеш?»

Модыш пурышо йолчием, кудыжым Италийыште, Францийын але США-н йӱдвелныже чият, мемнан элысе телылан изишат келшен ок тол, умыландара Константин Терновой. Тудын мутшо почеш, йӱштӧ игечыште кумдан палыме вынер кедым чияш лӱдыкшӧ, туге гынат шукынжо тыгай йолчием дене лум вочмешке ойырлаш огыт тырше. Тыге нуно шкеныштын тазалыкыштым лунчыртат веле.

«Кызыт телылан келшен толшо пундашан, шокшо кӧрган кроссовко-влак улыт. Вынер кеде нерген ойлаш гын, тудын дене йол вашке кылма. Тидланак кӧра икымше тӱнямбал сар жапыште шуко салтак колен, нунын сай йолчиемышт лийын огыл. Йӱштыштӧ вӱргорно туртеш, да варажым йолышто вӱр начарын кошташ тӱҥалеш», - ойла травматолог-ортопед.

Теле игечылан кеде вынер гыч ямдылымылан веле огыл келшен ок тол, тыгак тудын пундашыжат вичкыж. Кӱшыч мардеж пурымым термоноски дене аралаш лиеш гын, пундашыж дене нинмомат ышташ ок лий, а тудыжо кӱжгӧ лийшаш.

«Кузе машинан телымсе шиныжым палаш лиеш? Улыт шыма шина-влак, а эше улыт келге сӱретан. Ботинкылаштат тыгак. Кеҥежымсе йолчиемын пундашыже шыма, а телымсын - рифленый», - умыландара врач.