Калтаса районысо культура пашаеҥ-влак концерт да театр у сезоным почыныт

Тиде кечылаште Амчемучаш Культура пӧртыштӧ культура учреждений-влакын шыже-теле сезонлан ямде улмыштым тергымаш да у театр сезоным почмаш эртен.

Вашлийме верым арамлан огыл тыште ойырен налыныт. Пытартыш ийлаште Амчемучаш СДК-ан артистше-влакым мемнан районышто гына огыл, ӧрдыжтат сай палат. «Амче вел» мурышо ансамбль, «Ош пеледыш» куштышо коллектив, «Ший гармонь» гармонист-влакын ансамбльыштым чыла вере палат, очыни. Тений кеҥежым «Ший кандыра» фестивальыште амчемучашмыт Гран-прим сеҥен налыныт.

Сандене лач Амчемучаш клублан 2019-2020 ийысе концерт да театр сезоным почаш чап пуалтын.

Мероприятийым почмо деч ончыч «Калтаса ӱжара» газетын тӱҥ редакторжо В. Акиев южик клуб вуйлатыше-влаклан Тауштыме серыш-влакым кучыктен. Умбакыже клуб вуйлатыше ден культорганизатор-влаклан шыже-теле сезонлан клубым сай ямдылымыштлан диплом-влакым кучыктеныт.

Ялысе культура пӧрт-влак коклаште икымше верым Амчемучаш СДК (вуйлатыше А.Ю. Петраев), Краснохолмский селасе «Нефтяник» ДК (вуйлатыше Н.Д. Пята), Ӱлыл Качмаш СДК (вуйлатыше П.М. Раянов) налыныт; кокымшо – Кӧтерем селасе «Нефтяник» ДК (вуйлатыше А.Ф. Акчурина), Кугу Качак СДК (вуйлатыше А.А. Набиева), Кӱшыл Тиктем СДК (вуйлатыше И.Т. Камидуллина); кумшо – Кӧкыш ял СДК (вуйлатыше О.В. Кугубаева), Калмиямучаш СДК (вуйлатыше К.Т. Петраев).

Ял клуб-влак кокла гыч икымше верым Кургак клуб (вуйлатыше Е.М. Шайметова) налын, кокымшо Павасола клуб (вуйлатыше С.С. Гараева), кумшо – Савкмарий ял клуб (вуйлатыше Е.Г. Кубаева).

Тауштыме серыш дене Кугу Агытан СДК (вуйлатыше Э.С. Егорова), Тӧлдӧ СДК (Л.А. Байрамова), Калегин СДК (А.И. Николаева) палемдалтыныт.

Официаль ужаш деч вара Амчемучаш СДК-ан самодеятельный артистше-влак чапле концертым ончыктеныт.