Мӱйым чын араледа?

Тиде пайдале кочкыш, очыни, кажне суртышто уло. Мӱйын ойыртемже тыште – эмлыше вийже кугу. Тудым чын аралыме годым веле тамже ок вашталт, пайдале улмыжо кужу жап ок мӧҥгешт. Тугеже йодыш лектеш: мӱйым кузе чын аралаш?

Тудым аралаш эн келшыше температур – 6-20 градус марте шокшо. Тугеже илыме пӧлемыште, пачерыште огыл (тушто юж 25-28 градус марте ыра), а холодильникыште аралаш кӱлеш. Но тӱткӧ лийза: мӱйым темыман атым холодильникыш шындеда гын, тудын сайын петырнымыжым тергыза. Вет мӱй вӱдыжгӧ деч лӱдеш, а холодильникыште тудыжо утыжде уло. Эшеже мӱй ӧрдыж пушым сайын шыҥдара. Тугеже мӱй воктене чот ӱпшышӧ продукт, мутлан, кол але шопо ковышта, лийшаш огытыл.

Мӱйым 6 градус деч ӱлыкшӧ температурыштат аралаш лиеш, тиде пайдалыкшылан нимогай эҥгекымат ок ыште. Мӱй лачак пеҥгыдемеш гына. Но южын температуржо 20 градус деч кӱкшырак кӱза гын, мӱй пужлаш тӱҥалеш, витамин ден фермент-влак локтылалтыт да йомаш тӱҥалыт. Мӱйым икгай температурышто аралаш тыршыза, уке гын тудо иктӧр ок пеҥгыдем. Эшеже мӱйым волгыдо логалме деч аралыза, веет волгыдо тиде пайдале кочкышын микроб ваштареш кучедалме вийжым пытара. Сандене тудым пычкемыш верыште аралаш тыршыза.

Могай атыште аралаш? Янда, керамике, шун але пищевой пластик гыч ямдылыме атыште. Но тидым шотыш налза: палстик гыч ямдылыме атыште ик ий деч шуко аралаш ок темлалт. Тиде жап деч вара мӱй пластикыште улшо химический вартышым шыдараш тӱҥалеш. Мӱйым кӱртньӧ, цинк, але той гыч ямдылыме атыште аралаш ок йӧрӧ. Нине металл-влак дене тӱкнымеке, мӱй аяр гай вияныш савырна. Эшеже мӱйым аралыме ате моткоч яндар да кукшо лийшаш, тыгак сайын петырналтшаш.