Башкирийын Калтаса районысо полиций пашаеҥ-влак 1 №-ан Калтаса кыдалаш школын тунемшыже-влак дене профориентаций шотышто занятий-влакым эртареныт.

1№-ан Калтаса кыдалаш школышто черетан шуматкече кугырак класслаште тунемше-влак коклаште профориентаций пашалан лӱмдалтын ыле. Рвезе-влак деке унала полиций пашаеҥ-влак толыныт.

Школын кугу актовый залыштыже, тыште еҥ моткоч шуко погынен ыле, кугырак класслаште тунемше-влак полиций пашаеҥ-влак дене вашлийме уверлан куанышт. Тыгак вашлиймашке 2 №-ан Калтаса кыдалаш школ гычат тунемше-влак толыныт ыле.

Полиций пашаеҥ-влакын профориентаций «десантыштым» Россий МВД-ын Калтаса районысо пӧлкажын вуйлатышыже Э.В. Ляпустин вуйлатен. Самырык тукымым саламлышыжла, Эрнест Владимирович, ончыкыжым тыште шинчыше-влак кокла гыч иктаж-кӧжӧ полицийын профессийжым ойырен налеш манын, ӱшанен ойлен. Полицийын пашаж дене палыме ыштымаш вич минутан видеоролик гыч тӱҥалын. Тудым,Республикысе МВД-ын пресс-службыжо ямдылен.

Эрнест Владимирович школын ончыкылык выпускникше-влаклан могай тунемме заведенийлаште полиций пашаеҥ-влакым ямдылыме нерген каласкален.

- Рвезе-влаклан ик эн тӱҥ условий – армий радамыште служитлышаш да таза лийшаш улеш, – ойла полиций пӧлка вуйлатыше. – Вара образований да моло критерийым ончат. Ӱдырлан гын, армий радамыште служитлаш обязательный огыл.

Мучаште, эн оҥай тат – полиций пашаеҥын экипировкыжо, экспертно-криминалистический чемодан, пӧлка подразделенийын боевой вооруженийже дене палыме лиймаш. Аралымаш экипировко нерген вооружений шотышто инспектор Игорь Шашиев каласкалыш. Ик тунемшылан полицейский-влак шке косюмыштым чиктышт. Тыгодым Шашиев, экипировкын кажне атрибутшо могай случайлаште кучылталтмыже нерген тичмаш каласкалыш.

Экспертно-криминалистический чемодан кугак огыл, туге гынат тушто 150 тӱрлӧ предмет уло. Нунышт преступленийым ыштыме верыште эксперт пашам эртараш кугу полышым ончыктат. Чемоданыште мо улмо дене тунемше-влакым инспектор-кинолог Андрей Сатаев палыме ыштыш. Тыгак тудо вара служебный пий дене пашам ыштымыжым ончыктыш. Немыч овчарке тудын чыла командыжым шуктен.

Полиций пашаеҥ-влакын боевой вооруженийышт дене рвезе ден ӱдыр-влакым ДПС-ын старший инспекторжо Денис Савитов палыме ыштыш. Вооружений тӱрлӧ: пистолет, автомат, снайпер винтовко. Нунын пӱрымашышт икте – осал пашам ыштыше еҥым чараш.

Кугырак класслаште тунемше-влак полиций пашаеҥ-влакым уло кумылын колыштыч. Вашлиймаш деч вара шуко тунемше воружений ден экипировко ӱстел дене мийышт да лишкырак нунын дене палыме лийыч, кидышт дене чыла тӱкален ончышт.

Тиде кечын тыгак тунемше-влак дене вашлиймаште пӧлка вуйлатышын алмаштышыже Юрий Абдуллин да ГДН инспектор Наиля Камаева лийыныт да ойленыт.

Полиций пашаеҥ-влак районысо школлаште чӱчкыдын лиедат – ача-ава погынымаште участвоватлат, тӱрлӧ профилактике мероприятий-влакым да кажне ийын ончыкылык выпускник-влак дене профориентаций дене кылдалтше вашлиймаш-влакым эртарат.