Калтаса районысо вольык ончышо-влак телымсе сезоныш кусненыт

– Кеҥеж мучко районысо ушкал фермылаште телылан ямдылалтме пашам шуктеныт, олмыктеныт, – ойла ИКЦ-ын зоотехник-консультантше А.А. Иксанов. – Кургым ситышын ямдыленыт. Район мучко кокла шотышто ик вуй вольыклан 32,2 центнер курго. Игече начар лийын гынат, озанлыклаште кургым – сенажым, силосым, шудым – ситышын ямдыленыт. Фуражат ситышын уло.

40 центнер утла кургым тыгай озанлыклаште ямдылыме: Бикмурзинын КФО-то, «Восход» СХК-те, «Победа» ООО-н Кугу Качак производственный участкыштыже.

Районысо озанлыклаште кызыт 7 тӱжем 114 вуй КРС, тушеч лӱштымӧ ушкал – 3546 вуй.

Суткаште ик ушкал деч район мучко 11,6 килограмм дене шӧрым лӱштен налыт. Эн шуко шӧрым – 11,8 килограммым - Торасоласе «Восход СХК-те лӱштат.