«Шонынпыл» ДДТ-ын куштышо коллективше Тӱнямбал фестивальыште Гран-прим сеҥен налын

26 октябрьыште Ижевск олаште «Энергия звезд» шуко жанран Тӱнямбал фестиваль-конкурс эртен. Тыште талантан, чулым, эн сай ӱдыр ден рвезе-влак участвоватленыт. Тиде – творческий коллектив, посна мурызо-влак. Мемнан учрежденийын чапшым тиде фестивальыште «Вдохновение» старший группын «Фантазия» хореографий коллективше арален.

Тиде группын талантше нерген шуко каласкалш лиеш. Ӱдыр-влак шке пашаштым – куштымашым – уло чон дене йӧратат. Нуно шагат дене гына огыл репетироватлат, а кече мучко, кӱлеш гын, арня ден. Кажне кечын тыршен ыштыме паша шке результатшым пуа. Тиде группа район да республике конкурслаште чӱчкыдын участвоватла, но нуно ик верыште гына огыт шого, эре кӱшкӧ да кӱшкӧ кӱзаш тыршат. Лач тыгай кумыл дене ӱдыр-влак Ижевск олашке тарванышт да жюрим шке выступленийышт дене ӧрыктараш лийыч.

Сценыште нуно куштылыгын да сылнын койыныт. Зал нуным кумыл шуын ончен.

Конкурсын результатше почеш нуно кок наградым налыныт. «Листопад» номерлан I-ше степенян лауреат лӱмым налыныт. «Одиночество» куштымашлан конкурсын Гран-прижым!

Нунын выступленийышт жюрилан гына огыл келшен, тыгак эше нунылан 1000 еҥ онлайн-йӱклымаш почеш шке йӱкыштым пуэныт. Кеч ме пӧлекым налын огынал гынат, рейтинг почеш ме кокымшо лийынна, но мемнан верч ойгыртымашым ме сайын шижынна. Кӧ мыланна шке йӱкшым пуэн, кугу тау нунылан. А ӱдыр-шамыч шке вийланда ӱшаненда, сандене сеҥенда. Ӱдыр-влак чынжымак молодец улыт! Кӧ мыланна конкурсыш каяш полшен, поснак нунылан кугу тау. Тиде – учрежденийын директоржо Е.А. Самойлова, туныктышо-влак А.А. Туктамышева, М.А. Данилова, конешне, эше ача-ава-влак. Сеҥыше-влак вара шкешт мом ойлат? Тидын нерген нуно социальный сеть страницылаште возат: «Ончыч сценыште 2 минут репетироватлет, тиде, конешне, шагал, но ме етшышна. А вара ямдылалташ тӱҥална. Прическо, макияж, а эн тӱҥжӧ – растяжке да чыла элементым уэш-пачаш повторитлымаш. Концерт костюмым чийышна. Кенета тунктышынан йӱкшӧ: «Кулисе шеҥгеке кайыза!» Тыште мемнам чытырыкташ тӱҥале. Миен лектеш мо чыла, ме тидым ыштен кертына але уке? Сем йоҥгалтмеке ме сценыш лекна. Номер мучашке лишеме. Тункытышына иканаште тӱжем йодышым кольо, очыни: «Кузе куштышна? Чыланат шке верыштына ыльна мо?» тыгайрак вашмутым нална: «Чыла сай! Те молодец улыда!»

«Теве ме эше ик олаште выступатлышна. Ме пытартыш номер дене выступатлышна, вара вигак награждатлымаш тӱҥале… Кажне гана кунам хореографий коллектив мут йоҥгалтын… – ме шӱлаш тоштде шогенна. 3-шо ден 2-шо верлам налше-влакым палемдышт. I-ше степенян лауреат-влакым награждатлаш тӱҥальыч, вӱдышын кидыштыже грамото шагалемеш да шагалемеш, а мемнан нерген пуйто монденыт... Теве вӱдышын кидыштыже кум диплом веле кодо да тудо умбакыже шке мутшым шуя: «I-ше степенян лауреат «Фантазия» хореографий коллектив. Куналан мучаш уке ыле. Но мемнан эше ик номерна лийын. вӱдышӧ умбакыже ойла: «Мыйын кидыштем Гран-прим налше коллектив-влакын кок дипломышт…Икымше диплом – ме огыл…» Ме адакат шкенан коллективнан лӱмжым колына – Гран-при. «Одиночество» номерлан. Шинча куан шинчавӱд дене темын, тыгай кугу пиаллан, куанлан мучаш уке. А вет тидлан мотокч шуко тыршаш кӱлын».

»Шонанпыл» ДДТ-лан талант-влакым почмыжлан кугу тау. Мыланна ӱшаныше туныктышына-влаклан кугу тау!»

Ме, туныктышо-влак, район вуйлатыше-влак, Э.Р. Гариповалан, Ю.М. Садыровлан кугу таум каласена.

Шукерте огыл, 1 сентябрьлан хореографий кабинетлаште кӱвароҥам вашталтыме. Поснак кугу тау А.А. Кузнецовлан, подрядчик «Строитель-главбух» ООО-лан (вуйлатыше Ф.Р. Набиев), бригадир А.А. Кадыровлан, отделочник М.А. Кузнецовлан.

«Шонанпыл» ДДТ-ын коллективше.