Краснохолмский села гыч Бронниковмыт еш «Семья года – 2019» конкурсышто сеҥен

Калыкыште пушеҥге вожшо дене кучалтеш, айдеме – еш дене, манын ойлат. Еш поянлыклан лӱмдалтше конкурслан лач тиде мут-влак келшен толыт. Конкурсым самырык-влак дене пашам намийыше комитет ден «Центр» клуб организоватленыт. «Семья года – 2019» конкурсышто кум еш: Краснохолмский села гыч Бронниковмыт, ™лыл Качмаш гыч Батыровмыт ден Сатылбаевмыт – участвоватленыт. Тудо квест-модмаш формо дене эртен. Участник-влаклан палемдыме жапыште куд площадкым эрташ кӱлын. Кажне станцийыште команде-влакым оҥай конкурс вучен.

Спорт площадкыште конкурсант-влак шкеныштын спортивный формыштым ончыктеныт. Кулинар площадкыште кажне еш палемдыме ингридиент гыч, тӱҥ шотышто тиде салат лийын, кочкышым ямдылен. Калык площадкыште шочмо йылме дене почеламут ден муро-влакым колаш лийын. Еш флагым ямдылаш, походыш кайыме рюкзакаш вургемым погаш, предметын азимутшым муаш, поход мурым муралташ – чыла тидым приключений площадкыште ужаш лийын. Участник-влак классике литературым, туштым, калыкмутым моткоч сай палымыштым литератур станцийыште ончыктеныт.

Сеҥыше-влакым балл дене гына огыл палемденыт, тыгак заданий-влакым чын шуктымыштым, ешын чумыр улмыжымат шотыш налыныт.

Иктешлымеке, конкурсышто Краснохолмский села гыч Брнниковмыт еш сеҥен. Денис ден Зинфира кум сылне ӱдырым – Анастасиям, Аленам да Мариям – ончен кугемдат. Нуно чыланат оҥай модмаш-влак дене модаш, пӱртӱсыш кошташ, мураш да кушташ йӧратат, спорт дене кылым кучат.

Батыровмыт еш, кок ӱдырым да ик эргым ончен куштат, кокымшо верым налыныт. Нуно уло еш дене пӱртысыштӧ каналташ йӧратат, яра жапыштым пайдалын эртараш тыршат.

Вате-марий Сатылбаевмыт кок эргым ончен кугемдат. Нуно кумшо верым налыныт. Нунын еш пиалыштын секретше – икте-весым йӧратымаш, пагалымаш, полшымаш.

Чыла еш – конкурсын участникше-влак ойыртемалтше улыт, но нуным икте: ешын кажне еҥже келшен да оҥайын илашлан шагал огыл вийым пышта – ушен шога.

Квест – интеллектуальный, тарванылшан, развивающий команде дене модмо модыш. Кузе специалист-влак ойлат, модмаш деч вара участник-влак чулым, чолга да кутыраш йӧратыше лийыт. Квест-модмаш жапым гына огыл пайдалын эртараш полша, тыгак талантым почаш да шуараш, талын шонаш да шуко молылан туныкта. Тыште иктат огеш йокроклане, событий тӱрлӧ лиймылан кӧра, модшо-влак чыла кертмыштым ончыктен сеҥат.