Калтаса рвезе морпех лийын служитлен

Теҥыз пехотинец Ильмир Давлиев антитеррор подразделений группын составышкыже пурен, терроризм ваштареш кучедалме ятыр операцийлаште участвоватлен

Шочмо эллан теҥыз пехотышто служитлаш кугу чап манын шона ончычсо теҥыз пехотинец Ильмир Давлиев. Кеч тудын шонымыж почеш, ончычсо теҥыз пехотинец-влак огыт лий. Кеч-могай жапыштат нуно эл кушко шӱда, тушко каяш ямде улыт. Ильмир антитеррор подразделений группын посна составышкыже пурен да тӱрлӧ операцийлаште участвоватлен.

Ильмир тыматле рвезе улеш. Тудын теҥыз пехотышто служитлымыж нерген мый тудын Альфия акаж деч пален нальым.

Кажне рвезе, очыни, теҥыз пехото частьыште служитлаш шона. Ильмир тушто служитлаш шонен огыл. Мотор, виян да яшката рвезе призыв комиссий член-влак шинчаш вигак логалын, а Уфаште, республикысе призыв пунктышто тудын документшым шымлен лекмеке, каласеныт: «Теҥыз пехотышто служитлаш тӱҥалат. Тыгайже чылалан ок логал».

Тӱҥалтыште чынжым каласаш гын, теҥызыште служитлаш тунем шуаш неле лийын. Кажне кечын тренировко, марш-бросок-влак. Тудын службыж нерген служебный характеристика ойла:

«62250 войсковой частьыште службым эртымыж годым тудо шкенжым чыла пашам шуктышо да яын салтак семын гына ончыктен. АК-47 автоматын материальный ужашыжым тичмашнек тунемын. Тудын ончылан шындыме задаче-влакым тудо жапыштыже да кумылын шукта. Россий Федерацийысе Вооруженный Вийын Уставшым сайын пала. Неле условийлаште чын решенийым приниматла. Личный составым виктарен мошта.

Служебный обязанностьшымат сайын пала да моштен шукта. Эн ончыч ВС Устав ден караульный службылан тунем шуктен. Дежурно-вахтенный ден караул службымат нимогай замечаний деч посна шукта. Антитеррор подразделений группын составышкыже пурен, терроризм ваштареш кучедалме мероприятийлаште участвоватлен. Частьын личный составше тудым пагала. Замечаний-влаклан чын реагироватла да кӱлеш иктешлымашым ышта. Койыш-шоктыш дене кутыраш йӧрата, тыматле улеш».

Кызыт Ильмир Екатеринбург олаште ила да пашам ышта. Тудын ешыже пеш сай, йӧратыше ватыже уло. Теҥыз пехотышто службыжым кугешнен шарналта.

Мемнан справкына:

Российыште Теҥыз пехото кечым РФ ВМФ Главнокомандующийын приказше почеш 1995 ий 19 декабрьыште палемдаш пеҥгыдемдыме.

Теҥыз пехотинец-влак Кугу Отечественный сар жапыште лӱдде кредалыныт. Тушман-влак нуным «шем колымаш» манын лӱмденыт. Тидыже шем бушлат да лӱддымылыклан кӧра, докан.