Шоя юрист-влакын кидышкышт кузе логалаш огыл?

Йодыш-влаклан адвокат Азат Имашев вашешта

– Еҥ-влак деч оксам ондалкален налаш 100 йӧн уло, – каласен икана Ильф ден Петровын произведенийжын тӱҥ геройжо. Остап Бендерын современникше-влак ончычсо пашаеҥыштым ятырлан ончылтеныт да пыртартыш ийлаште рынкым юридический услуго-влак дене теменыт.

– Мылам кредитым налмаште поручитель лияш темленыт, кӧненам. А кунам банк оксам пӧртылташ йодын, мый оласе ик юридический компанийыш полышым йодын мийышым, – воза мыланна газетнам лудшына. – Услугылан ятыр гына оксам тӱлышым. Туге гынат нунын деч нимогай полышым шым уж. Варажым нуно мыйын телефон дене йыҥгыртымемлан ваштымыштым чарненыт.

– Проблеме пӱсӧ! – ойла Башкортостанын адвокат-влак коллегийын членже Азат Имашев. – Кызыт шоя юрист-влак ятыр улыт. Юридический компанийын офислаштыже юридический образований деч посна еҥ-влак пашам ыштен кертыт. Шукерте огыл мемнан деке районысо предприятийын ик вуйлатышыже полышым йодын толын. Кеҥежым тудо корно-транспорт проишествийын участникше лийын. Уфа оласе юрист-влак тудлан полшаш кӧненыт – эҥгекын суммыжым пӧртылташ лийыныт. Фирме дене договорым ыштеныт, тидлан шагал огыл оксам тӱлен. Тылзе гыч юридический фирме эше оксам тӱлаш йодын. Юрист-влак деч йыҥгыртымым вучен шуктен огыл, вуйлатыше шке йыҥгыртен. А тудлан йӧршеш вес еҥ-влак вашештеныт, вара юрист-влак вашештымыштым чарненыт, а нунын офисышт йӧршеш петыралтын…

Мом ышташ?

Тыгай случайлаште профессионал адвокат-влак деч полышым йодман, – каҥашым пуа Азат Имашев. Адвокат-влак «Об адвокатской деятельности» федераль пунчалын йодмашыж дене келшышын, профессионал этикын кодексше почеш пашам ыштат.

Профессионал этике дене келшышын, нуно шке пашаштым чын да сай шуктышаш, доверительын законный интересшым конституционный, уголовный, гражданский, административный судопроизводстве дене аралышаш улыт. Арбитражный третейский судышто доверитель семын участвоватлат.

Адвокат кодексым пудырта гын, тудо дисциплинарный проиводство шотышто мутым куча, эсогыл адвокат статус деч посна кодын кертеш. Юридический компанийын пашаеҥже-влак нимо деч огыт лӱд. Чынжым каласаш гын, 1 октябрь гыч судебный представитель-влакын высший юридический образованийышт лийшаш, тидын годым гражданский паша шотыштат, – палемдыш Азат Фоатович. – Тидыже шоя юрист-влакым кораҥдаш да юридический услугым ончыктымо йодыш шотышто порядкым ышташ полша.