«У ийысе» антиалкогольный законопроект

Башкортостаныште кужу У ий каникул жапыште аракам шагалрак ужалыме шотышто мерым приниматлаш тӱҥалыт. Тыгай мере сай эффектым гына пуышаш. Россий МЧС-ын Башкортостан Республикысе управленийжын вуйлатышыжын алмаштышыже Эдуард Идрисов тыге шона.

Тиддеч посна Россий МЧС-ын, Башкортостан Республике вуйлатышын пунчалышт дене келшышын, 25 ноябрь гыч республикыште «У ий» операций эрта. Чыла объект, кушто пайрем мероприятий-влак эрташ тӱҥалыт, нуным спасатель ден добровольный пожарный формирований-влак текшыраш тӱҥалыт.

Ушештарена, республикыште У ий каникул жапыште аракам шагалрак ужалыме шотышто законын проектшым тений декабрьыште ончат да приниматлат. У ий пайремым палемдыме годым аракам шуко йӱмӧ шотышто йодышым Башкортостан вуйлатыше Радий Хабиров нӧлталын.

Закон дене келшышын, аракам 3 январьыште огыт ужале, тыгак 4, 5, 6 январьыште тудым 14.00 гыч 10.00 шагат марте ужалымым чарнат.

Мемнан корр.