Черланыше-влакын чотышт шагалемын

Калтаса районышто тений мыняр еҥ инфекционный чер дене черланен? Тидын нерген Башкортостан Республике Роспотребнадзор управленийын Нефтекамскысе территориаль пӧлкажын вуйлатышыже Л.Н. Акбашева санитарно-противоэпидемический комиссийын погынымаштыже ойлен.

Кузе тудо палемден, 2018 ий 10 тылзылан инфекционный чер дене черланыме 2698 случай лийын, тений 10 тылзылан – 2152, 546-лан шагалрак. Гепатит дене черланымаш 17 процентлан шукемын, тидын годым хронический вирусан С гепатит дене черланыме 2 случайым регистрироватлыме, В гепатит вирусым нумалше – 6 случай.

Ветряной оспа дене черланымаш 4,4 ганалан шагалемын.

Ведомство вуйлатышын мутшо почеш, ВИЧ-инфекций дене черланымаш шагалемын, 16 случай гыч 11 марте, тыгак янлык пурылмо случай 28 процентлан ӱлышемын, 91 гыч 71 случай марте.