Калтаса ужара
+17 °С
Пылан
Все новости
Новости
3 теле 2019, 23:00

«Сказка» шке юбилейжым палемден

«Жап моткоч писын эрта» – Калтаса селасе «Сказка» йочасадын юбилейышкыже толшо еҥ-влак тыгерак ойленыт.

«Жап моткоч писын эрта» – Калтаса селасе «Сказка» йочасадын юбилейышкыже толшо еҥ-влак тыгерак ойленыт.
Юбилей пайрем шӱлышым капкам пурымо гычак шижаш лийын: сылне сем йоҥген, сӧралын чийыше пашаеҥ-влак да моторын сӧрастарыме пӧлем-влак. Уна-влакымат нуно уло кумылын вашлийыныт.
Событийын рӱдӧ верже – актовый зал – чылт йомакысе полат гай койын, арамлан огыл, очыни, йочасад «Сказка» лӱмым нумалеш.
Йочасад коллетивым юбилей дене саламлаш район администрацийын образований пӧлкажын вуйлатышыже Эльвира Гарипова, пашам пырля ыштыме йолташышт, ача-ава да моло уна-влакат толыныт ыле.
«Учреждений нерген ойлымо годым воспитатель-влак нерген каласен кодыде нигузе ок лий. Педсостав – творческий, тыршыше да моткоч чолга. Таче «Сказка» йочасадыште индеш воспитатель, музыкальный руководитель, туныктышо-логопед, медшӱжар да техперсонал тыршат. Вич ий пашам ыштыме жапыште йочасад коллектив районын культура да мер илышыштыже чулымын участвоватла», – каласен Эльвира Рашитовна.
Тыгак йочасадым районысо ӱдырамаш-влак ушем вуйлатыше Зоя Максимова, образований пӧлкан методистше Наталья Сатаева саламлышт.
Юбилярым тыгак тиде пайремын тӱҥ участникше – йоча-шамыч – саламлышт. Нуно шке йочасадыштлан сылне мурым да весела куштымаш-влакым пӧлеклышт. Поян концерт программе ик шӱлышыштӧ эртыш.
Коллективын мурен да куштен моштымыжо пайремыш погынышо еҥ-влакым ӧрыктарыш. «Сказка» йочасадын кажне пашаеҥже талантан улеш. Тиде келшен илыше, пашам тыршен ыштыше коллективыште икте-весым умлымаш, икшыве-шамычым йӧратымаш шӱлыш озалана. Концерт мучаште воспитатель ден икшыве-влак «Мы вместе» мурым шергылтарышт. Юбилей дате историйыш кая, а коллективым ончылно у сеҥымаш-влак вучат.
Илыш умбакыже шуйна, йоча жап нигушкат ок кай – тудо «Сказка» йочасадыште илен, ила да илаш тӱҥалеш.