Еш пиал секрет дене палдареныт

Икшывын да Аван кечышт-влак пайрем деч ончыч Калтаса районысо реабилитаций филиалыште йыргешке ӱстел эртен.

Тушто инвалид икшыве-влакым ончен куштышо ача-ава-влак, БР Калтаса район МР администраций вуйлатышын алмаштыже Елена Алексеева, БР Калтаса район МР-ын ӱдырамашмыт каҥаш вуйлатыше Зоя Максимова, райрӱдӧ эмлымверын врачше Далларыса Сафина, Кӧтерем кыдалаш школын туныктымо паша шотышто завучшо Светлана Саметова, Нефтекамск оласе икшыве-влакын тазалыкышт да гармонично вияҥме шотышто «Дентал» рӱдерын врач-педиатрже Елена Филипович, «Еш» межрайонный рӱдерын йӱдвел-касвел пӧлкажын психологшо Светлана Хамидуллина, культура пӧрт ден ялсовет-влакын вуйлатышышт уна лийыныт.

Мероприятий кок этап гыч шоген. Икымше ужашыже, теоретический – «Пиалан еш» йыргешке ӱстел семын лийын. Йыргешке ӱстелыште ятыр ача ден авам тургыжландарыше йодыш-влакым каҥашеныт. Эн ончыч тиде икшыван еш-влаклан социаль полышым ончыктымаш, еш пиалын поянлыкшым да ӱдырамаш тазалыкым арален кодымаш, ешыште чыла сай да таза икшывым ончен куштымаш секрет-влак дене пайлалтмаш.

Кокымшо этапше практический лийын. Мероприятийыш толшо-влак «Пиал островлаште» путешествоватленыт. Труд дене инструктор Элеонора Калиева ача-ава-влак дене брошкым ыштыме шотышто мастер-классым ончыктен. Тыште кажне тыланыше еҥ шкаланже сылнештарымашым ыштен да тудым пеленже наҥгаен кертын. «Тазалык» островышто ЛФК шотышто инструктор Инна Кумушбаева да массаж шотышто медшӱжар Ирина Воробьева шкалан шке кузе массажым ышташ туныктеныт да даосский гимнастикын элементше-влакым ончыктеныт. Информационный островышто социаль туныктышо Наталья Гимранова да ФТ шотышто медшӱжар Юлия Ибаева участник-влакым икшыве-влаклан у творческий конкурс да мӧҥгыштӧ пайдаланаш у физиоаппаратура-влак дене палыме ыштеныт. «Релакс» островышто педагог-психолог Дарья Сюткина ава-влак дене психорелаксацийым эртарен.

Пайремыште сай кумыл да весела музыка лийын. Мероприятий деч вара ты вашлиймаш чылалан пайдале лие манын пеҥгыдын каласаш лиеш.

И. Васинкина,