Калтаса районысо инвалид-влак тӱрлӧ таҥасымашлаште участвоватлат. Районышто веле огыл, тыгак республикыштат

Инвалид-влаклан тӱняште илаш куштылго огыл. Кажне кечын чер дене кучедалмаш да молат нунын илышыштым нелемда. Инвалидность – чер огыл. Районысо инвалид-влак организацийын вуйлатышыже Роберт Иванов кузе палемда, нуно моло еҥ-влак семынак тичмаш илыш дене илен кертыт.

– Ме инвалид-влакым районышто эртыше тӱрлӧ мероприятийлашке ушаш тыршена, тыгак ме шкеат ятыр мероприятийым эртарена, – каласкала Роберт Иванович. – Лач тыгай мероприятийлаште нуно шкеныштым ончыктен керыт, икте-весе дене мутланаш йӧн уло. Тӱҥ шотышто ме спорт дене кылдалтше мероприятий-влакым эртараш тыршена. Тиде оҥай да тазалыкланат пайдале. Мыланна результат тӱҥ огыл, процессше кӱлешанрак. Мемнан инвалидна-влак, мутлан, ече да куштылго атлетике дене марафонлаште чӱчкыдын участвоватлат. Ме кажне ийын инвалид-влак коклаште спорт фестивальым эртаренна. Республикыште инвалид-влак коклаште эртарыме кажне таҥасымаште участвоватлаш тыршена. Да кажне гана сеҥена, манаш лиеш. Тений, мутлан, февральыште, Уфа олаште, шахмат турнирыште участвоватленна ыле. Тыште ме лу эн сай-влак коклашке логалынна. Мартыште бильярд дене таҥасымашке миенна. Июньышто, Уфаште, Россий да рӱдолан кечыжлан лӱмдалтше физкультурно-массовый мероприяий-влак эртеныт. Куржталынна, шашке, дартс дене таҥасенна да чумыр команде дене икымше верым налынна. Личный зачетлаштат чыла икымше верлам налын улына. Тыгаяк таҥасымаш-влакым августышто, Физкультурникын кечыж годым эртарыме. Туштат ме икымше лийынна. 25-28 июньышто кандаш еҥ гыч шогышо команде дене спорт туризм дене таҥасымашлаште участвоватлышна. Тудо Кушнаренков районышто эртыш. Вӱд туризм, Ош Вичыште катамаран дене таҥасымаште ме кумшо верым налынна. Август мучаште штангым нӧлтымаште да кыр спорт дене таҥасымаште участвоватлышна. Коло кум команде кокла гыч визымше лийна. Шукерте огыл, ноябрь мучаште шашке дене турнирыште участвоватлышна да 26 команде кокла гыч 7-ше верым сеҥен нална.

Палемдаш кӱлеш, таҥасымашке ик еҥ-влак гына огыт кошт. Спортын тӱрлӧ видше дене тӱрлӧ еҥ таҥаса. Спортлан гына огыл ме кугу тӱткышым ойырена. Тений группа дене Кугу Иремельыш мийышна. Республикыште эртыше «Прикосновение» творческий фестиваль-конкурсышто участвоватлышна. Тиде – инвалид-влак коклаште актер мастарлык шотышто конкурс, тудо Театр ийлан лӱмдалтын. Уфа оласе драмтеатр сценыште «Свадьба в Малиновке» кинофильм гыч ужашым ончыктышна. Ик номинацийыште дипломым сеҥен нална.

Кодшо кугарнян районышто инвалид-влак коклаште шахмат дене турнир эртен. Тудо инвалид-влакын Тӱнямбал кечыштлан лӱмдалтын лийын.

Таҥасымаште районнан тӱрлӧ ял ден селала гыч шахматым йӧратыше-влак участвоватленыт. Пӧръеҥ-влак коклаште икымше верым Калтаса села гыч Аркадьев Олег Александрович сеҥен налын. Кокымшо верым Шайнуров Рифкат Иванович ден Захаров Александр Михайдаров налыныт. Личный вашлиймаште Шайнуров партийым модын сеҥен да ший медальым налын. Тыге лийын, Захаров кумшо верым налын.

™дырамаш-влак коклаште турнирыште Келтей ял гыч Ишинбаева Ольга Ильчигуловна сеҥен, кокымшо ден кумшо верлам Калтаса села гыч Анкудинова Любовь Владимировна ден Муллагалиева Муршида Мухьяновна налыныт.

Диплом ден шергакан приз-влакым сеҥыше ден призер-влаклан районысо инвалид-влак ушемын вуйлатышыже Иванов Роберт Иванович кучыктен.