Аскин районышто «Ару Танып» межрегиональный экологий акцийым иктешлыме

2019 ий 25 сентябрьыште Аскин районышто «Ару Танып» межрегиональный экологий акцийым иктешлыме, тудым «Зеленая Башкирия» экологий проект почеш эртарыме. Тиде проект Башкортостан Республикысе шым районым – Аскин, Балтач, Бурай, Дӧртӧлӧ, Калтаса, Краснокам, Татышле да Пермь кундемысе Чернушкам ушен шога.

Акцийын тӱҥ задачыже – 1 август гыч 25 сентябрь марте Башкортостан Республике ден Пермь кундемыште Танып эҥерым да тудын сержым шӱкшак деч эрыкташ.

Тиде проектым Башкортостан Республикысе природопользований да экологий министерстве шонен да эртарен. Ий гыч ийыш тыгай акцийым эртарымаш кугу пайдам пуа. «Ару Танып» акцийыш тений икымше гана Аскин район ушнен. Чылаже кандаш районышто 1665 еҥ участвоватлен, 140,5 км серым эрыктыме.

Аскин район администраций вуйлатыше Ришат Дихин ден Башкортостан Республикысе природопользований да экологий министерствын сводно-аналитике пӧлкан вуйлатышыже Ринат Фаткуллин акцийыш ушнышо чыла участниклан кугу таум каласеныт.

Проектын авторжо, БР-се Минэкологийын Бирскысе территориаль комитетын вӱдышӧ специалист-экспертше Рифат Сафинын мутшо почеш, чыла районысо муниципалитетлаште полышым ончыктеныт. Мероприятийлаште калык уло кумылын участвоватлен. Тиде акций моткоч кӱлешан, вет Танып эҥер йӱдвел зонышто эн кужу – 345 км – улеш. Ош Вичын пурла притокшо Юл-Чолман вӱд бассейныш пура. Элнан вӱд системыжлан кугу полышым ончыктымо.

Р. Сафин,