Эн ныжыл да поро кумылан-влаклан лӱмдалтеш

Шукерте огыл Тошто Оръямучаш тичмаш огыл кыдалаш школышто Тимкина Римма Изирушевна Аван кечыжлан лӱмдалтше мероприятийым эртарен.

Мероприятийыште тунемше да нунын ача-авашт участвоватленыт. Йоча-шамыч пайремлан пеш сай ямдылалтыныт ыле. Концертлан ямдылалтме да тудым эртарыме чыла йодмашым шуктымо лийын.

Уло поро шижмашыштым нуно ава нерген мурышко, тыгак куштымашке пыштеныт.

Нуно почеламут-влакым каласкаленыт, мурым муреныт, куштеныт, ава-влак икшывышт дене пырля тӱрлӧ конкурсышто участвоватленыт. А мучаште йоча-влак шке аваштлан саламлымаш дене открыткым да шке кид дене ыштыме поделкым кучыктеныт.

1-9 классыште чыла тунемше шке аваштым пайрем дене саламлен. Тӱҥалтыш класслаште тунемше-влак моткоч чулым лийыныт. Мероприятийым ямдылымаште кугу полышым тунемше-влакын школысо самоуправленийын членже ден класс вуйлатыше-влак ончыктеныт. Чыла палемдыме мероприятий кӱкшӧ уровеньыште эртен.

Кугырак класслаште тунемше-влак да нунын класс вуйлатышышт – А.В. Камидуллин, Ю.С. Исликаева, И.И. Шаймарданова – шке кид дене ава-влаклан пӧлекым ямдыленыт.

А. Камидуллин.