Нимо деч ныжыл да шерге

Кече еда лектын шогышо сомыл коклаште ме шке аваланна тудым кузе чот йӧратымына нерген ойлаш мондена. А календарьыште тиде посна дате тидым каласаш йӧным пуа.

Аван кечыжлан лӱмдалтше пайрем концерт 2 №-ан Калтаса кыдалаш школышто ий еда эртаралтеш да поро йӱлашке пурен. Нимолан ӧраш, кунам 27 ноябрьыште школын актовый залыштыже яра верат кодын огыл.

Пайремлан ончылгочак ямдылалташ тӱҥалыныт. Ноябрьын икымше кечылаж гычак школышто ты пайремлан лӱмдалтше конкурс-влак эртеныт. Тиде «Мыйын авам» сӱрет конкурс (1-4 класс-влак участвоватленыт), «Авамлан пӧлек» поделке-влак конкурс (1-4 класс), «Авамлан открытке» конкурс (1-5 класс), «Тудын деч шерге еҥ уке…» (5-9 класс). Ава-влак да унамыт школын фоештыже тунемше-влакын пашашт дене палыме лийын кертыныт.

Концертын икымше номерже куштымаш лийын – 1б классыште тунемше-влак да нунын авашт деч сюрприз (класс вуйлатыше С.А. Хузина). Нуно залыште шинчыше калыклан сай кумылым пуртеныт. 1а классыште тунемше ӱдыр ден эрге-влак шӱмеш логалше почеламут-влакым лудыныт (класс вуйлатыше С.А. Хузина). «Башкир ӱдыр-влак» ныжыл куштымашым 2 а классыште тунемше-влак пӧлекленыт (класс вуйлатыше И.Е. Айдимирова). 2б классыште тунемше-влак «Валенки» номерышт дене ӧрыктареныт (класс вуйлатыше Н.С. Аксаева). Тиде кастене 3а, 5а да 6а класслаште тунемше-влак (класс вуйлатыше М.Н. Петрова, Н.Е. Тимофеева, А.Р. Ахмадуллин, музыкаль вуйлатыше Г.П. Байрамова) ава нерген мурым йоҥгалтареныт. Нуным Е. Аксаева ден Е. Анкудинован дуэтышт (класс вуйлатыше Е.Г. Шайнурова) кумылым пуртеныт. Ава-влак шке икшывыштын выступленийыштым куанен онченыт. Кажне номерыштлан совым рӱжге кыреныт.

Логопед Т.Я. Сокова икшыве-влак дене пырля аван йӧратымашыже да тургыжланымашыже нерген шонаш таратыше йомакым модын ончыктеныт. А 6 а классыште тунемше-влак (класс вуйлатыше А.Р. Ахмадуллин) литература зарисовкым ончыктеныт, а 5 классыште тунемше ӱдыр ден эрге-влак (кл. вуйлатыше Т.П. Сайгина) одым лудыныт.

Тиде кечын ава ден кова-влаклан шуко поро мутым каласыме. 9 а классыште тунемше В. Яшкина (кл. вуйлатыше Р.Ф. Ганиева), тудо шке вокаллан тунемеш, «Бабушка, спой мне…» мурым йоҥгалтарен да шуко еҥын шинчаштыже шинчавӱдым ужаш лийын. Тудым мемнан школнан шӱдыржӧ улеш манын каласаш лиеш.

Вӱдышӧ-влак Л. Хазиева (11 класс) да Ахметов Егор (9а класс) пайремыште почеламут-влак лудыныт.

Мучаште школ директор Р.Х. Бигаев погынышо-влакым пайрем дене шокшын саламлен да икшыве-влакым туныктымаште ӱшаным ончыктымыштлан таум каласен. Школын да классын илышыштыже чолган участвоватлыше ава-влаклан Таум каласыман грамота-влакым кучыктеныт.

Пайрем сай эртен, чылаштынат кумылыштым нӧлтен.

Н.Н. Ахунова,