Райрӱдӧ Культура пӧртыштӧ «Авай, тыйым ласкан ӧндалам» пайрем концерт эртен

Каныш кече-влак деч ончыч Калтаса райрӱдыштӧ ик эн поро, ныжыл да волгыдо пайремым – Аван кечыжым палемденыт. Ава да кова-влак лӱмеш – кажне еҥлан ик эн шерге еҥ-влаклан – «Авай, тыйым ласкан ӧндалам» пайрем концерт эртен.

Тиде кастене РДК-ын залыштыже калык тич темын, концертым ончаш толшо-влак эсогыл проходышто шогеныт. Артист-влакын выступленийыштым калтасамыт веле огыл, пошкудо ялла гычат еҥ-влак толыныт.

Тӱнян ик эн чапле еҥже-влак лӱмеш сцене гыч шокшо, шӱмеш логалше мут-влак йоҥгеныт. Ава-влакым тыгак район администраций вуйлатыше Юрий Минзарипович Садыров шокшын саламлен.

Пайрем награде деч посна лийын огыл. Башкортостан Республикылан 100 ий темме лӱмеш юбилей медаль дене Любовь Фаррахова палемдалтын. Район администрацийын Чап грамотыжо-влак дене «Вера» рӱдерын социаль пашаеҥже-влак Снежана Биктимирова ден Наталья Сайтиева, «Россий Почто» пашаеҥ-влак Марина Савитова ден Нина Ощепкова палемдалтыныт. Тыгак шке шокшыштым, йӧратымашыштым пӧлеклыше, шке опекышкышт налше ӱдырамаш-влакым чапландареныт. Тиде Елена Кузнецова ден Руфина Шашиева. Нунын ешыштышт приемный икшыве-влак илат да кушкыт.

«Ава улмаш талантым почеш» республике конкурсышто участвоватлымылан Таум каласыман серыш дене Краснохолмский села гыч Анастасия Бормотова да Калтаса села гыч Ирина Бадретдинова палемдалтыныт.

Ава-ача попечений деч посна кодшо икшыве да тулык икшыве-влаклан суравочым кучыктымаш шӱм-чоным тарватыше тат лийын. Тиде кечын у пачер ден суравочым Алевтина Зайнетдинова, Наталья Мацукова да Анастасия Стерхова налыныт. Ушештарена, тений тулык икшыве да ача-ава попечений деч посна кодшо икшыве-влаклан социаль полышым ончыктымо шотышто ешартыш гарантий программе почеш 11 еҥ у пачер-влак деч суравочым налыныт.

Сценыш икте почеш весе райрӱдӧ Культура пӧртын артистше ден самырык талант-влак лектыныт. Концертын участникше-влак муреныт, куштеныт, ава-влаклан лӱмдалтше почеламут-влакым лудыныт. Залыште шинчыше калыклан Кристина Русиева, Лилия Матвеева, Генадий Тимеряев, Ринат Хайдаров, Фидави Гибадуллин, Ольга Алкаева, Светлана Мусина сольный номер-влакым пӧлекленыт. «Смайлики», «Звездочки» куштымаш коллектив-влаклан совым рӱжге кыреныт. Изи йоча-влак дене Анна Туктамышева ден Марина Данилова пашам ыштат. Пайрем чаплын эртен. Тудо поснак поро, шӱмеш логалше лийын.