Калтаса районышто ЗАГС-ын у залыштыже икымше регистраций эртен

Кужу перерыв деч вара Калтаса селаште ЗАГС-ын у залже почылтын. Районысо Культура пӧртым пужен ыштыме жапыште сӱан сералтмаш-влак кинотеатрыште эртеныт. Но ешым чумырышо шуко самырык еҥ пайрем мероприятийым эртарашлан пошкудо Нефтекамск олам, Николо-Березовко селам, Янаул олам ойырен налын. Вет сӱан мотор событий, сандене тудын залжым сӧрастарымашымат шотыш налман.

Ынде районышто илыше кажне еҥ сӱан пайремым мотор, пайрем шӱлышыштӧ сӧрастарыме залыште палемден кертеш. Сӱаным эртарыме залым пӱтынек вашталтеныт, уэмденыт. Вашталтыш чыла вереат: пырдыж ден потолок, икманаш, чыла обстановко вестӱрлемын, пайремым эртарыме залым ош-сирень тӱс дене сӧрастареныт. Потолокым гын еш символ – шергаш дене сӧрастареныт. Тыгак ача-ава, оръеҥ, уна-влаклан шинчаш верым ямдылыме.

Икымше мужыр, кӧ у залыште шке мужыраҥмашыжым регистрироватленыт, Акиева Галина ден Ямиев Сергей лийыныт. Кугырнян, 6 декабрьыште, Калтаса ЗАГС пӧлкаште нуно закон почеш вате ден марий лийыныт. Сергей Кӱшыл Качмаш ял гыч улеш, Галина – Тошто Калтаса гыч.

Совым рӱж кырыме почеш залышке Галина ден Сергей пурат. Ош тувыр дене оръеҥ, классике костюм дене каче, ача-ава-влак пеледыш аршаш дене. Могай сай, кунам кок йӧратыше шӱм иктыш ушна!

Калтаса районысо ЗАГС вуйлатыше Ирина Владимировна Валеева, самырык мужырым шокшын саламлыш, мучаште нунылан Башкортостан Республике вуйлатыше Радий Хабиров деч Саламлыме адресым кучыктыш.

Тиде кечынак Мендельсонын марше эше кок мужырлан йоҥген: у залыште сӱан пайремым тыгак Эльвира Асылгареева ден Валерий Гаврилов, Гульназ Галиева ден Марат Сагдеев эртареныт.

У еш моторын сӧрастарыме залыште шочмаш, тиде символ да поро знак лийын кодеш да самырык-влаклан кужу да пиалан еш илышым сӧра.