Калтаса ужара
+18 °С
Пылан
Все новости
Новости
10 теле 2019, 22:20

Пел курым пырля кид кучалын ошкылыт

Еш илышыште моткоч кӱлешан датым тений Краснохолмский села гыч Гимадрисламовмыт еш палемден: 9 сентябрьыште пырля илымыштлан 50 ий темын
Сӱан кечын оръеҥ-влаклан шӧртньӧ сӱан марте илаш тыланат. Тиде поро тыланымаш Баян Гимадрисламович ден Файруза Маликовна Гимадрисламовмытланат шуын. Нуно пел курым наре пырля улыт да 50 ий ончычсо семынак умбакыжат икте-весышт дене шыман кутырен, икте-весыштым пагален да переген илат. А чыла тиде 1967 ий гыч тӱҥалын.
Файруза Маликовна, почтышто оператор лийын пашам ыштен. Тудым Кучаш ялыш почто пӧлкам почаш колтеныт. Кучаш ял – Баян Гимадрисламовичын шочмо-кушмо верже, тыште тудо шочын, кушкын, армийыште службым эртыме деч вара колхозышто пашам ышташ тӱҥалын. Тыште, Кучаш ялыште, самырык еҥ-влак палыме лийыныт. Ик ий гыч Баян Гимадрисламович Файруза Маликовнам марлан налаш толын. Тыге самырык еш пелашыжын шочмо суртыштыжо илаш тӱҥалеш. А 1969 ий сентябрьыште нуно нефтяникмыт Краснохолмский поселкыш илаш кусненыт да шке кылыштым официально регистрироватленыт.
Тылеч вара вате-марий Краснохолмский селаште илат. Файруза Маликовнан паша биографийже почто дене кылдалтын, Краснохолмскысе почто пӧлкаште пашам ыштен. Пашам тыршен ыштымыжлан тудлан «Башкортостан связьын ветеранже» почетан лӱмым пуэныт. Баян Гимадрисламович ӱмыржӧ мучко водитель лийын пашам ыштен, организаций-влак гына вашталтыныт: сельпо, корно предприятий, Краснохолмский УБР. Шуко Почетан грамота-влак дене палемдалтын, «Пашан ветеранже» лӱмжӧ уло.
Икымше кече гычак еш илышыштышт ныжылгылык, тургыжланымаш, икте-весым пагалымаш шижылтын. Нунын кок чапле эргым Ренат ден Мадисым ончен куштеныт, кызыт шке уныкашт-влаклан куанен илат да нунылан полшаш тыршат.
Шӧртньӧ юбиляр-влак кужу жап илыме еш секретыштым нуно огыт шылте:
– Тӱҥжӧ – икте-весым пагалаш, йӧраташ кӱлеш. Еш илышыште мый «оза» улам манын ойлыман огыл. Тыгак икте-весылан ӱшаныман. Тунам гына кеч тиде витле ий, кеч кудло ий эрта, келшымаште да йӧратымаште илаш тӱҥалыда.