Пиротехнике манат да… пайдаланен моштыман вет!

Икымше петарде, конфетти ден темыме хлопушко, пудешталтше шар, бенгальский ден римский сорта, мланде ӱмбалсе да ӱстембал фонтан пурат.

Ты пиротехнике эн шулдо да, правил почеш, тынарыжак лӱдыкшӧ да мотор огыл.

Кокымшо тӱшкаш мланде ӱмбалсе да чоҥештылше фейерверкым пурташ шотлан толеш. Чоҥештылшыже икмыняр залп дене 30 м наре кӱкшытыш кӱза. Мотор манаш йылме ок савырне: заряд-влак поче-поче пудешталтыт да пеш писын йӧрат. Мланде ӱмбалсе салют моторрак, но фигур-влак 20 секунд волгалтыт да йӧрат веле.

Кумшо тӱшкаш ракет ден салют батарейым пуртат. Кокымшыжым утларак налыт. Тудо икмыняр заряд дене поче-поче пудешталтеш. Ракетыште таран двигатель уло, сандене тудо мланде гыч стартым шкеак налеш, южышто пудешталтеш да тӱрлӧ тӱсан шарже дене куандара.

Нылымше тӱшка – профессиональный салют.

Ит сусырго, ит сусырго!

Пиротехникым пазарыште огыл, а лӱмын ыштыме кевытыште гына налза, вет тушто кажне сатун лицензийже да гарнатийже лийшаш.

Упаковкын тӱжвал тӱсшым шымлен ончалза: коробко целлофан дене пич петырыме лийшаш. Иктаж вере рож уло гын, сатум, очыни, йоҥылыш аралыме, установко локтылалт кертын. Пиротехникан икмыняр коробкам кид дене висен ончыза, тыгодым нелыракшым ойырен налза – тыгай установкышто тар шукырак, сандене салютат моторрак лиеш. Коробка куштылго гын, производитель пудешталтше веществам аныклен, тыгай установко кужун да кӱшкӧ ок лӱйкале.

Пиротехнике дене пайдаланыме деч ончыч инструкцийым тӱткын лудса, уке гын пычкемышыште да калык коклаште кӱлешан татым коден, тыгак установкым йоҥылыш шогалтен кертыда – тидыже тендан веле огыл, тыгак воктенда шогышо еҥ-влакланат тазалыкыштлан лӱдыкшӧ.