Куан дене йочасадыш

Кеч-могай ийготышто икшыве-влаклан йочасадыш кошташ тунемаш куштылго огыл, а изи ньога-влаклан поснак неле. Тидын дене икшывын илышыже вашталтеш: лишыл да шочшо еҥ-влак пелен уке улыт, раш режим, палыдыме кугыеҥ-влакым колыштмаш. Тидлан да у илышлан тунемаш жап кӱлеш.

Мый Кӧтеремысе йочасадыште ясельный группышто воспитатель лийын пашам ыштем. Сандене мыйын тӱҥ задачем – икшывым йочасадлан туныктымаш.

Эрдене шинчавӱд да нечкыланымаш, омо укелык, кочмышт ок шу, шӱлыкан улыт да чӱчкыдын черланат – тиде чыла у условийлан тунемме признак-влак. Тыгай жап ик кече гыч тылзе марте шуйнен кертеш. Кажне икшыве посна, шке семынже ты жапым эрта.

Сандене адаптаций жап куштылгынрак эртыже манын, ача-ава-влак дене кугу пашам эртараш кӱлеш. Лач пырляште гына икшывылан полшен кертына. Пеш сай, кунам ача-ава-влак йочасадын режимжым палат да мӧҥгыштат тудым кучаш тыршат.

Ме, йочасадын пашаеҥже-влак, ача-ава-влаклан полшена, кӱлеш темлымаш-влакым пуэна, икшыве нерген шукырак пален налаш тыршена. Йочасадыште икшыве шукырак пален налаш тырша гын, адаптаций жап писынрак да куштылгынрак эрта.

Е. Абдулманова,