Мемнан эн илалше лудшына, рабселькор-влакын республикысе шуко съездын участницыжлан декабрь тӱҥалтыште 80 ий темеш

Педагогика пашан ветеранже Вагазова Блюда Хамзиновна 1939 ий 1 декабрьыште Кучаш ялыште шочын. Тудын ачаже Вагазов Хамза ден аваже Вагазова Фаизам коллективизаций жапыште раскулачиватленыт, ачажым ссылкыш колтеныт, погыштым конфисковатленыт.

Мемнан эллан неле жап толын шуын, Блюдан кугырак кум изаже – Казихан, Халик, Явдат фронтыш каеныт. Нунын кокла гыч Явдат гына контузий дене мӧҥгышкӧ пӧртылын. Тудо Берлин марте шуын.

Блюда Хамзиновна Кучаш шымияш школым тунем лектын, кыдалаш школым 1958 ийыште Бурайыште тунем лектын да тудым вигак Ново-Хамзинский шымияш школыш туныктышылан пашашке колтеныт. Химик-биолог кӱшыл шинчымашым паша деч кӱрылтде налын.

Тыге тудын просвещений аланыште паша корныжо тӱҥалын. Урок-влакым намийыме деч посна, Блюда Хамзиновна школ пеленсе участкым вуйлатен, йоча-влакым мланде пашам йӧраташ кумылаҥден шоген. Палемдаш кӱлеш, тудым ачаж ден аваже изинекак пашам йӧраташ туныктеныт.

Блюда Хамзиновна кужу да сай лектышан илышым илен, школышто 53 ий тыршен. Пашан ветеранже улеш, шуко Чап грамот дене палемдалтын. 25 ий верысе партий организацийыште пропаганда пашам намиен. Ныл гана Кучаш ялсоветыш депутатлан сайлатын, ик гана — райсоветыш. А илыш ончыко кая. Кучаш ялыштат ынде школ уке, туге гынат Блюда Хамзиновнан да моло туныктышо-влакынат пашашт тунемшышт-влакын пӱрымашыштышт ила.

Блюда Хамзиновнам юбилейже дене саламлена да тудлан пеҥгыде тазалыкым да чыла сайым гына тыланен кодына.

Мемнан корр.