Все новости
Новости
11 теле 2019, 23:40

Образований форумыш коштын толмаш

Ноябрь тылзын 2 №-ан Калтаса кыдалаш школын выпускной классше Уфа олашке образований форумыш, а тудыжо ВДНХ-ЭКСПО площадкыште эртен, коштын толын.
Ме шуматкечын 6.00 шагат эрдене корныш тарванышна. Ныл шагат утла кайышна, но ты жап шижде, вашке да писын эртен кайыш, вет мемнан группына мутланаш йӧратышан, сай тунемше, школ илышын чолга рвезыже-влак гыч шоген: Аксаев Павел, Загидуллина Элиза, Магданов Ильнар, Осипов Руслан, Хазиева Лия да Челпанова Алена. Мемнан группынан организаторжо – йӧратыме туныктышына, Хазиева Дина Геннадьевна. Форумыш толмеке, ме ныл интерактивный зоныш логална. Икымшыже «Зона презентаций вузов» Россий вузын вӱдышыжӧ-влак дене палыме лийна. Кӱшыл тунемме заведений-влак деч посна тыште тӱрлӧ ола гыч колледж-влакын презентацийышт лийын. Конешне ме республикысе вуз ден колледж-влаклан эҥертенна. Тидыже куандара, южиктына тунемме заведенийым ойырен налыныт. Ындыжым Виш омсам почмо кечын тушко миен толаш кӱлеш лиеш.
«ЗОЖ» площадкыште ме тӱрлӧ сусыргымаште икымше полышым ончыкташ тунемна. Вӱрым чараш тунеммынна, манекеныште икымше полышым ончыктенна да молат. Тачысе кечылан мемнан школнан чыла выпускникше, форумын участникше-влак икымше медицине полышым ончыктен кертыт.
Профориентаций площадке мыланна ик эн кӱлешан лийын. Ме чыланат тестым эртенна да уда огыл результат-влакым ончыктенна. Тыштак ме компьютер графикын инновационный технологийже дене палыме лийна.
Интерактивный площадке-влак деч посна мастер-класс дене икмыняр зал пашам ыштен. Тиде «Мустафина Фатима Хамидовна» – туныктымо да воспитатлыме шотышто мастер-класс; «Взлетай» модуль проектым илышыш шыҥдарыме шотышто мастер-класс-влак да молат. Шукыжо ача-ава ден туныктышо-влаклан лӱмдалтын лийын. Мыланна, кыдалаш школын выпускникше-влаклан тыгай мероприятийыште лияш моткоч келшен. Ты форумышто ме районнан чапшым араленна, чыла организатор да вуз-влакын туныктышышт кушеч улыда манын йодышыштлан ме «Ме, 2 №-ан Калтаса кыдалаш школ гыч» манын кугешнен ойленна.
Мемнан келшыше командына лӱм дене район администраций вуйлатыше Гарипова Эльвира Рашитовналан, 2 №-ан Калтаса кыдалаш школ директор Бигаев Ришат Хадыевичлан, класс вуйлатыше Хазиева Дина Геннадьевналан, тыгак водитель Савельев Вадимлан кугу таум каласена. Уфа олашке форумыш коштын толмаште мемнам ГАИ-ын инспекторжо Савитов Денис ужатен миен. Тау тудланат.
А. Челпанова, 9 «А» классыште тунемше.