Кокла Качмаш ял калык корнылан оксам погаш ямде

Ӱлыл Качмаш ялсоветыш пурышо Кокла Качмаш ял кугу огыл. Тыште чылаже 15 пӧрт. Туге гынат тудо ила, тудын ончыкылыкшо уке манаш, нигузе йылме ок тошт. Пытартыш 3-4 ий коклаште гына ялыште вич у пӧртым нӧлтен шындыме, эше кокытым чоҥат.

Ял калык шочмо кундемжым коден каяш ок вашке, мӧҥгешла, олала гыч шочмо ялышкышт пӧртылыт. Эн тӱҥжӧ – Кокла Качмаш ял калык ик еш семын келшен ила.

Йӧршеш вес сӱрет Кӧкыш ялыште. Тушто ППМИ-те участвоватлыме шотышто погынымашым эртареныт. Ик шагат ялын пӱсӧ йодышыжо-влак нерген кутыреныт. А мучаште Крыловын басньыштыже гай миен лектын. Ик шонымашке толын огытыл, нимогай йодышымат решатлен кертын огытыл. ППМИ-те участвоватлашлан эше вер улмым пален налмеке, Кокла Качмаш ялын старостаже, тыгак ™лыл Качмаш ялсоветын депутатше Байбатыров Геннадий Пакирбаевич ял калык дене мутланен да нуным конкурсышко ушнаш ӱжын. Кок погынымашым эртареныт да ялыште Полевой уремым тӱзаташ – корным нӧлталаш да тушко щебеньым шараш – лийыныт.

Тидлан кажне сурт гыч 5 тӱжем теҥге дене погаш кутырен келшеныт. Ялсовет администраций тидлан 75 тӱжем теҥгем ойыра да тынарак оксам спонсор полыш семын фермер озанлык вуйлатыше Бикмурзин Владислав Петрович ойыраш келшен.

Кокла Качмаш ял калык республикысе комиссий нуным проектыштым йӧпла да нунын ялышт йӧршеш вес тӱсым налеш манын шонат.