1 №-ан Калтаса КШ-ын тунемшыже Кремльысе елкаш кая

Кремыльысе У ий елкаште кажне йоча лияш шона, очыни. Тений тушко Калтаса район гыч 1 №-ан Калтаса КШ-ын тунемшыже Вахитова Влада кая.

Шымше классыште тунемше Влада тыгай пӧлекым сулен налын. Тудо районысо, республикысе конкурслаште да Россий ден тӱнямбалне эртыше «Вдохновение» мурызо-влакын конкурслаштышт участвоватла. Башкирий гыч Кремыльысе елкаш чылаже 142 тунемше кая, нуным туныктышо ден врач-влак ужатен мият. Нунылан посна рейсым ямдылат.

А 20 декабрьыште Уфа оласе «Башкортостан» кугыжаныш концерт залыште республикысе елка эрта. Тений тушко 780 тунемше мия.

Башкирийын рӱдӧ елкашкыже мемнан район гыч вич тунемше кая. Тиде – сайын тунемше, олимпиаде ден спорт таҥасымашлаште сеҥыше-влак, фестиваль ден творческий конкурс-влакын лауреатышт-влак – Исаев Ринат (Павасола КШ), Исламгалиева Рузанна (Киябак тичмаш огыл КШ), Кандиев Максим (Актыган тичмаш огыл КШ), Нурисламова Регина (3 №-ан Краснохолмский КШ), Шамыкаева Анастасия (Марий Мераҥ тичмаш огыл КШ).