Калтаса ужара
+18 °С
Пылан
Все новости
Новости
14 теле 2019, 21:16

Калтаса ДРСУ-шко у Т-150 тракторым кондымо. Тудым Республике вуйлатыше Радий Хабиров пӧлеклен. Техникым опытан механизатор Радион Гареевлан ӱшанен кучыктеныт

Октябрь мучаште корно озанлык пашаеҥ-влак шкеныштын профессиональ пайремыштым палемденыт. Тидын лӱмеш Уфа олаште эртыше пайремыште Республике вуйлатыше Радий Хабиров «Башкиравтодорын» икмыняр предприятийжылан республике деч пӧлек шотеш у технике деч суравочым кучыктен. Пиалан-влак радам коклаш мемнан районын ДРСУ-ат логалын.
– Вуйлатыше деч пӧлек мыланна пеш кугу полыш лийын, вет ончылно теле, – ойла Калтаса ДРСУ вуйлатыше Фанзил Масхутович Халиуллин. – Корным лум деч эрыктымаште тудо моткоч кӱлешан.
У техникым опытан механизатор Радион Евгеньевич Гареевлан кучыктеныт. Тыгай кугу куатан трактор-влак дене тудо ятыр ий пашам ыштен, паша опытшат ситышын. Руль воктене тудо 1989 ий гыч, 30 ий паша стажше уло. Самырыкше годым Ленин лӱмеш колхозышто тыршен, вара нефтяник-влак дене «Арланнефть» НГДУ-то, ынде корно паша озанлыкыште тырша. Фанзил Масхутович Гареев нерген лач поро мутым гына ойла. Шке пашажым сай палыше пашаеҥ, кӱкшӧ классан профессионал улеш. Радион Евгеньевичын тукымыштыжо тракторист-влак ятыр лийыныт.
Тудын ачаже, Евгений Шипаевич, селаште ятыр ий механизатор лийын ыштен да эргыже-влакымат техникым йӧраташ туныктен. Родионын кугырак изаже – Геннадий тыгак кӱкшӧ классан механизатор улеш, «ИТС-Агро» ООО-то комбайн, трактор дене ышта. Уло кӧлан умбакыже эстафетымат пуаш. Родионын кум эргыже кушкеш. Тимур ден Иван школышто тунемыт, А Матвейлан ик ий гына темын. Кугеммеке, очыни, нунат шке илышыштым технике дене кылдат. Ачаж деч примерым налыт.
Тиде телым, кодшийсе семынак, Родион Евгеньевич Тӧлдӧ ялсовет территорийыште корным эрыкташ тӱҥалеш. Тиде Тогыний, Тӧлдӧ, Тошто ден У Оръямучаш, Васильевке яллаште. Тудо вет шкежат Тогыний ялыште ила. Предприятийланат тыге йӧнанрак, техникым рӱдӧ базе гыч тушко колташ ок кӱл.
Чылаже корно пашаеҥ-влаклан лум деч район мучко 357 километр корным эрыкташ кӱлеш.
– Телым пашам ышташ мемнан технике ямде, – шуя шке мутшым умбакыже Калтаса ДРСУ вуйлатыше Ф.М. Халиуллин. – Кум «КамАЗ», кок автогрейдер, кок гусеничный бульдозер, кум Т-150 трактор, иктыже ротор дене. Тыгак экскаватор, погрузчик да кугу куатан Т-700 трактор уло. Технике уло, уло кӧлан пашам ышташ. Коллектив мемнан келшен илыше.
Чыла механизатор ден водитель-влак кугу опытан улыт, нунын паша стажыштат кугу, шке пашаштым сайын шуктат. Мемнан ончылан шындыме пашам ме шуктена манын шонем. Коллективнам шушаш У ий дене уло кумылын саламлем да чылаланат тазалыкым, пиалым да чыла сайым гына тыланен кодам.