Инвалид-влак коклаште спорт фестиваль эртен

Башкирийын Калтаса районыштыжо инвалид-влак коклаште поро йӱлашке пурышо спорт фестиваль эртен, а тудо Инвалид-влакын тӱнямбал кечыштлан лӱмдалтын лийын

Спорт пайрем райрӱдын спорткомплексыштыже эртен. Икте-весышт коклаште таҥасаш, мутланаш районын чыла луклаж гыч 50 утла еҥ погынен. Нуно спортын куд видше дене таҥасеныт: дартсым кышкеныт, армреслинг, куржталыныт, шашке дене модыныт, кырым нӧлтеныт, баскетбол топым корзиныш кышкеныт.

Шашке дене модмаште ӱдырамаш-влак коклаште Ольга Ишинбаева сеҥен, кокымшо верыш Любовь Анкудинова лектын, кумшо – Неля Валеева. Ты спортын видыштыже пӧръеҥ-влак коклаште Лаврентий Ахметшин сеҥен, кокымшо Василий Кугубаев лийын, кумшо – Назир Ахкямов.

Армреслингыште пӧръеҥ-влак гына таҥасеныт. Тыштат Лаврентий Ахметшин сеҥен. Ильнур Тимиршин кокымшо лийын, кумшо – Руслан Дмитриев.

Дартс дене ӱдырамаш-влак коклаште Зайтуна Гафарова эн тура лийын, Татьяна Вечтомова кокымшо верыш лектын, кумшо – Татьяна Захарова. Пӧръеҥ-влак коклаште Константин Иштубаев эн шуко очком поген, Лаврентий Ахметшин кокымшо лийын, Артур Байрамов кумшо верыш лектын.

Ӱдырамаш-влак коклаште баскетбол топым корзиныш кышкымаште Лидия Ахмадуллина эн сай лийын, кокымшо вер – Татьяна Захарова, кумшо – Зайтуна Гафарова.

Пӧръеҥ-влак коклаште Артур Байрамов сеҥен. А призер-влак коклашке Юрий Иванов ден Александр Хайбуллин пуреныт.

Куржталмаште ӱдырамаш-влак коклаште Муршида Муллагалиева писе лийын, латик ияш Альбина Янышева изишлан варашрак кодын, Лидия Ахмадуллина кумшо лийын. А пӧръеҥ-влак коклаште Ильнур Тимиршин сеҥен, кокымшо Руслан Дмитриев куржын толын, кумшо – Степан Бишаров.

Ӱдырамаш-влак коклаште кырым нӧлтымаште Лидия Ахмадуллина эн виян лийын. Татьяна Вечтомова кокымшо верыш лектын, кумшо – Муршида Муллагалиева.

Пӧръеҥ-влак коклаште ты спортын видыштыжак Вадим Байдимиров сеҥен. Кокымшо верыш Константин Иштубаев лектын, кумшо – Руслан Дмитриев.

Сеҥыше ден призер-влакым районысо инвалид-влак организацийын дипломжо дене палемденыт да шергакан пӧлек-влакым кучыктеныт.