Кӱшыл Тиктем ялыште Удмурт калык культурын кечыже эртен

Кодшо кугарнян Кӱшыл Тиктем ялыште Удмурт калык культурын кечыже эртен. Мероприятий тиде ялын шочшыжо, удмурт писатель Валишин Роман Галиаскаровичын шочмо кечыжлан лӱмдалтын.

Кӱшыл Тиктем калык деч посна лӱмлӧ землякнам шарналташ тышке тыгак районысо удмурт-влак илыме моло ялла, Краснохолмский ден Калтаса села-влак гычат толыныт ыле. Тыгак Нефтекамск ола, Янаул, Татышле районла гыч художественный самодеятельность коллектив-влак шке мастарлыкышт дене куандарышт. Пайрем тӱҥалме деч ончыч унамыт Роман Валишинлан лӱмдалтше музейыште лийыныт, Культура пӧртын фойештыже удмурт калыкын народно-прикладной усталык выставкыжым онченыт.

Пайремым саламмут дене район администраций вуйлатыше Ю.М. Садыров почын. Юрий Минзарипович Кӱшыл Тиктем ял калыкым, поснак верысе культура пашаеҥ-влакым, шке землякыштым шарнымыштлан, тудын творчествыжым калык коклаште шаркалымыштлан, музей экспонат-влакым пойдарымыштлан кугу таум каласен.

– Ме шке йылмынам, культурынам мондышаш огынал, шочмо йылмынам йӧратышаш улына. Тыгай шӱлышыштӧ шке икшывына-влакымат куштышаш улына. Тыште мыланна Роман Галиаскаровичын творчествыжат полшен кертеш. Тудын книгаже-влакым лудса, тидлан икшывыда-влакымат кумылаҥден шогыза, – каласен шке выступленийыштыже Юрий Минзарипович.

Тыгак пайрем мероприятийын участникше-влакым Башкортостан Республикысе калык-влак Келшымаш Пӧртын удмурт-влакын историко-культурный рӱдержым вуйлатышыже Ирина Самигуллина, районысо ӱдырамаш-влак ушемын вуйлатышыже Зоя Максимова, Келтей ялсовет администраций вуйлатыше Булат Рашитов саламленыт.

Пайремын концерт программыштыже мемнан районысо удмурт-влак илыме ялла гыч самодеятельный коллектив-влак выступатленыт, тыгак Янаул ден Татышле районла, Нефтекамск ола гычат артист-влак куандареныт.

Кӱшыл Тиктем РДК-ан сценыштыже тиде кечын удмурт культура озаланен – мурым муреныт, почеламутым лудыныт, куштеныт.