Калтаса ужара
+21 °С
Пылан
Все новости
Новости
17 теле 2019, 20:20

Краснохолмский селаште «Шежере байрамы» тукымвож конкурс эртен

Ты конкурсым Краснохолмский ялсовет администраций, «Нефтяник» Культура пӧртын, Краснохолмский библиотекын да «Ватан» Башкир калык-культура рӱдерын пашаеҥже-влак организоватленыт.
Тукымвож пайремыште вич еш участвоватлен – Бронниковмыт, Егоровмыт, Исламгалиевмыт, Багмановмыт да Ибатовмыт. Нуно залыште шинчыше калык ден жюрилан шке тукымвожышт, шочшышт да еш йӱлашт нерген ойленыт.
Поро йӱлашке пурышо конкурс икмыняр заданий гыч шоген. Икымшыштыже тукымвож нерген палыме лийыныт. Кажне участник тӱрлӧ кугытан да форматан тукымвожым ончыктен. Земфира Бронниковалан шке ешыже нерген ойлаш тудын ӱдыржӧ-влак – Анастасия, Алена да Мария полшеныт . Нуно тыгак видеороликым ончыктеныт. Анна Егорова Искандаровмыт тукымым ончыктен да шке ача-аважын еш укшыжо-влак нерген ойлен. Тудлан уло мо дене кугешнаш, вет кугезе кочаже Кугу Ачамланде сарыште геройла кредалын, тыныс жапыште чаплын тыршен. Исламгалиевмыт ешын тукымжо – Краснокам район гыч толын. Нунын тукымыштышт келшен илыше шуко икшыван еш-влак ятыр улыт.
Ильфат Багманов шке тукымжым шукертсек шымла. Тудо шке ешыж нерген сведенийым шымше насыл марте чумырен, тудын тукымвож пушеҥгыштыже 100 утла лӱм. А Багмановмыт тукымвож нерген ойлымаш изи спектакльыш савырнен, тыште Оля Багманован шежере нерген авторский почеламутшо-влак йоҥгеныт. Ибатовмыт тукымышто оҥай да талантан еҥ-влак ятыр улыт. Нунын нерген Яна Ибатовалан мемнан районнан краеведше Робер Шарафович Шакиров ойлаш полшен. Ибатовмытын ик тукымышт Наполеон армий ваштареш тептярский полкышто кучедалын. Весыже – мемнан современникна – поэт Филимон Ибатов лийын.
Творческий конкурсышто башкир, марий йылме дене муро-влак йоҥгеныт, тыгак марий, руш-башкир куштымаш попурри лийын.
Пайремын ик эн кумыллан ужашыже – кулинар конкурс лийын. Кажне еш шкенжын кочкышыжо дене палыме ыштен. Бронниковмыт кулебяк дене ӧрыктарен, а тудыжым нуно мотор сӧсна семын оформитленыт – эртыше ийлан комплимент лийын. Егоровмыт мелнам кӱэштын конденыт да тыглайым огыл, у ийысе темлымаш дене лийын. Ибатовмытат мелна дене сийленыт, а нуныштым ялысе коҥгаште кӱэштме, посна шке ешыштын рецептышт дене ыштыме. Исламгалиевмыт еш королевский ватрушкым кӱэштын. Багмановмыт тукым шке вожшым Бустанай ял гыч налын, а тудыжо мотор Керей сер воктене верланен. Тугеже, колым кучымаш нунын еш пашашт, а кол гыч кочкышым ямдылыме рецепт тукым гыч тукымыш кусна. Сандене нуно фаршироватлыме нужголым ямдыленыт.
Тукымвож пайремыште чапле концертым ончыктеныт. Тидын нерген каласыде ок лий. Тудын сценыштыже Культура пӧртын артистше-влак выступатленыт. Тиде пане дене шоктышо «Холмичи» театр, «Акварельки» куштышо коллектив, «Вдохновение» физкультурно-тазартыме группа, «Йэншишмэ» фольклор ансамбль, Арсентий Иргибаев, Лариса Байбатырова, Ильшат Габидуллин да Фаниса Зарипова. А конкурсым Евгения Кузнецова вӱден.
Эше тидым палемдаш кӱлеш, тукымвож пайрем – ешын кугу историйже. Чаманен каласаш логалеш, жап писын эрта, кажне тукым дене ты историйын ужашыже кая, а тудыжым нимогай архивыште тӱзаташ ок лий. Конкурсын участникше-влак ты информацийым пален налыныт, возен коденыт, шке еш шарнымашыштышт аралат. Тыште нуно сеҥыше улыт. Жюри тыгай аклымашым луктын. Бронниковмытын шежерешт эн келге вожлан шотлалтын. Сандене нунылан «За использование современных мультимедийных программ в составлении шежере» номинацийым пуэныт. А «Ремесло моих предков» номинацийыште Ибатовмыт ойыртемалтын. «Творческое начало моих предков» номинаций Исламгалиемытлан пуалтын. «За оригинальность и творческий подход в оформлении шежере» номинаций дене Егоровмыт палемдалтын.
Чыла участник Диплом да конкурсын организаторжо деч шарнымаш пӧлек дене палемдалтын.
С. Аркадьева.