Шуматкечын Калтаса ДЮСШ-ын ече трассыштыже ече дене икымше таҥасымаш эртен

Тиде ечым йӧратыше, тыгак профессионал-влаклан йӱлашкак пурышо таҥасымаш. Тышке район гычат, тыгак Нефтекамск ола гычат ечызе-влак толыныт ыле. Но район гыч шагал лийыныт, лач Ӱлыл Качмаш, Калмиямучаш да Калтаса села гыч гынат спортсмен-влак лийыныт. А Нефтекамск ола гыч ечызе-влак кок автобус дене толыныт. Очыни, районысо кум школышто гына – Ӱлыл Качмаш, Калмиямучаш да Калтаса – тунемше-влак ече дене коштыт. Ончыч гын кажне школ гыч физкультурым туныктышо шке тунемшыже-влакым тыгай таҥасамашлашке конден. Вет тиде ече сезоным почмаш, кажне школ гыч кеч 5-6 тунемше лийшаш ыле, докан.

Эртыше каныш кече йӱштӧ, но кечан лийын. Тений спортсмен-влак, лум шагаллан кӧра, ече ӱмбак кужу жап шогал кертын огытыл. Таҥасымаш деч ончыч гына, вӱргечын да кугарнян, пӱртӱс ечызе-влакым куандараш лийын, лум лумын. Эр гычак ече трассым эрыктен шынденыт, икманаш, таҥасымашлан чыла ямде лийын. Тидын шотышто спортшколын директоржо Марсел Давлетшин тыршен. Тыге, шуматкечын, ече базышке таҥасымашын участникше-влак погынаш тӱҥалыныт. Эн самырыклан 7 ий лийын, эн кугылан – 55 ий. Тӱҥ шотышто тиде ечызе-влакак кажне ийын тыгай таҥасымаште участвоватлат. Нунын коклаште у спортсмен-влакат улыт. Тиде кечын ечыгорнышко 80 утла еҥ лектын. Спортсмен-влак ийгот тӱшка дене икте гыч вич километрыш куржыныт. Стадионышто болельщик-влакат шуко погыненыт ыле: ача ден ава, кова ден коча, ака-шӱжар, иза-шольо да конешне, йолташ-влак. Нойышо самырык ечызылан финиш деч ончыч поро мутым колаш моткоч кумылло лийын да «Молан мый тыште участвоватлаш кӧнышым? Мом мый тыште ыштем?» шонымаш вуй гыч тыманмеш лектын возын.

Пьедесталыш тиде гана тӱҥ шотышто таҥасымашын унаже-влак – Нефтекамск ола гыч спортсмен-влак – кӱзеныт. 2007-2008 ийлаште шочшо-влак тӱшкам налаш. Ӱдыр-влак коклаште, тыгак рвезе-влак коклаштат, Нефтекамск ола гыч спортсмен-влак сеҥеныт. Мемнан район гыч 11 да 12 ияш рвезе ден ӱдыр-влак ончыл верлам налын огытыл. Туге гынат, икмынярыже сеҥыше-влак радамыш логалыныт. Ече сезоным сеҥымаш дене Тимиряева Елизавета, Вахитов Дмитрий, Нурмухаметов Андрей, Алитдинова Милана, Колбина Полина – почыныт. Нуно чыланат 1 №-ан Калтаса кыдалаш школышто тунемыт, ДЮСШ-ан воспитанникше улыт. Тыгак Шамшиев Александр (кок километрым кокымшо толын), Васина Елизавета (кум километрым кумшо толын), Колбин Леонид (ныл километрым куржмаште кумшо толын), Мустафина Юлия (ик километрым куржмаште кокымшо лийын). Районысо самырык спортсмен-влак кокла гыч поснак Ӱлыл Качмаш кыдалаш школын тунемшыже-влакым палемдаш кӱлеш: индешымше классыште тунемше Байдуганов Маркел кокымшо верым сеҥен налын, кокымшо классыште тунемше-влак Кумужбаев Данил ден Сатылбаев Никита – кокымшо ден кумшо. Павасола кыдалаш школын нылымше классыште тунемшыже Никифоров Кирилл шке ийгот тӱшкаштыже кумшо лийын. 2 №-ан Калтаса кыдалаш школын физкультурым туныктышыжо Валентина Давлетшина кажне таҥасымаште участвоватла да шке тунемшыже-влакым спортым йӧраташ кумылаҥден шога. Эше чыла тидым шке примерже дене ончыкта.

Ече сезоным официально почмо. Ончылно шуко таҥасымаш, кушто мемнан самырык спортсменна-влак шке вийыштым, койыш-шоктышыштым ончыкташ тӱҥалыт.