Калтаса ужара
+20 °С
Пылан
Все новости
Новости
14 шорыкйол 2020, 21:30

Калтасасе социаль приютын воспитанникше-влак деке У ий деч ончыч шуко уна толын

Калтасасе социаль приютын воспитанникше-влак деке У ий деч ончыч шуко уна толын. Кӧ нуным куандарен, шӱм-чон шокшыштым пуаш тыршен, Калтаса районысо ийготыш шудымо икшыве да йоча-влаклан социаль приютын пӧлкажым вуйлатыше Рушания Фируновна Шаймарданова ойлен.
– Мемнан Калтаса районысо ийготыш шудымо икшыве да йоча-влаклан социаль приютын пӧлкаштыже У ий деч ончыч поро йӱла почеш икшыве-влаклан пӧлек дене шуко уна толеш. Унамытым вашлияш икшыве-влак ончылгочак ямдылалтыт, мурым, почеламут-влакым тунемыт. Ешартыш образований дене занятийлаште мотор пайрем поделке-влакым ямдыленыт. Сандене тышке толшо ик унат сувенир деч посна мӧҥгышкыжӧ пӧртылын огыл.
Ик эн ончыч воспитанник-влакым Нефтекамск ола гыч посна предприниматель-влак А.Н. Шамсутдинов ден Р.Ф. Лутфуллин саламленыт, нуно кажне икшывылан тамле пӧлекым конденыт да кучыктеныт. БР Минимуществе погым виктарыме шотышто Калтаса районысо комитетын, Мировой судын, суд пристав-влакын пашаеҥышт-влак У ийысе шере пӧлек дене толыныт.
22 декабрьыште мемнан деке «Ангел-подорожник» порылык фондын волонтержо-влак развлекательный программе да тамле когыльо дене толыныт. Волонтер-влак кажне икшывылан пӧлекым, тамле да шере конфетке-влакым да модышым аралаш контейнер-влакым конденыт.
Уфа ола гыч спонсор – «Ресо-Мед» медицине страховой компанийын пашаеҥже-влак мемнан воспитанникше-влакым вниманий деч посна огыт кодо. Нунат тамле пӧлекым, хозяйственный, канцелярский сатум да утюгым конденыт.
Краснохолмский села гыч пашан ветеранже В.И. Порошин приютын воспитанникше-влаклан поро коча да вучымо уна улеш. Василий Ильич пелашыж дене пырля икшыве-влакым олма когыльо, компот, тамле варенье, шере кочкыш дене сийленыт. Икшыве-влак ынышт черлане манын шке пакчаштышт ончен куштымо чеснокым конденыт.
Калтаса ДРСУ-ын пашаеҥже-влакат ӧрдыжеш кодын огытыл, У ийысе пӧлек дене толыныт.
КПРФ-ын Нефтекамскысе горкомын членже «Моноплан» ООО дене пырля икшыве-влаклан модышым, тамле пӧлекым, гимнастический ковер-влакым веле огыл, тыгак Йӱштӧ Кугыза, Лумӱдыр да кугу Курчак дене У ийысе представленийым ончыктеныт.
27 декабрьыште икшыве-влак деке Нефтекамскысе педагогика колледжын 4-ше курсышто тунемше студент-влак толыныт. Нуно икшыве-влаклан канцеляр сатум, книгам да модыш-влакым конденыт.
У ий деч ончыч кажне икшыве Йӱштӧ Кугызалан шке тыланымашыжым воза. Мемнан воспитанникна-влаклат серышым возеныт.
Нефтекамск ола гыч «Кровля плюс» ТПК-ын спонсор-директоржо Р.Р. Давлетшинлан кӧра нунын тыланымашышт шукталтын. Рустам Рамильевич икшыве-влаклан аниматор, пӧлек дене пайремым конден.
Киябак ял гыч З.А. Шаймарданова да Нефтекамск ола гыч А.Р. Суфияроват икшыве-влакым шере пӧлек дене куандареныт.
Уна-влакын кондымо пӧлекым нужнан илыше 33 еш гыч икшыве-влаклан эше шалатыме лиеш.
Икшыве-влак верч тургыжланыше-влаклан шӱм гыч лекше кугу таум каласена. Пӧлек-влак ача ден авам огыт вашталте. Туге гынат ме нунын илышыштым пиаланрак ыштен кертына.
Справке. Калтаса районысо социаль приют 2001 ий 11 декабрь гыч пашам ышта. Ты жапыште илышын неле ситуацийышкыже логалше 972 йочалан тудо шокшо пӧртыш савырнен. Тачысе кечылан тыште Калтаса район гыч гына огыл, тыгак Бурай район да Нефтекамск ола гыч икшыве-влак туныкталтыт.