У ий пайрем годым мемнан районышко Российысе писатель ушемын членже, Чомар ялын шочшыжо, Павел Брычков толын ыле

У ий пайрем годым мемнан районышко Российысе писатель ушемын членже, Чомар ялын шочшыжо, Павел Брычков толын ыле

Районысо рӱдӧ библиотекын лудмо залыштыже писатель лудшо, библиотеке пашаеҥ-влак да районысо творческий актив дене вашлийын. Павел Алексеевичым кинде-шӧнчал да муро дене вашлийыныт. Тыште «Барыня» мурышо калык ансамбль тыршен. Тений, кугу да палыме уна-влак гыч мемнан районыш эн ончыч Павел Алексеевич толын.

Мемнан газетын декабрьыште лекше ик номерыштыже районысо историй да краеведений музейын директоржо Роберт Шакиртов Павел Брычков нерген каласкален ыле. Сандене мый таче писательын творческий биографийыже гыч веле икмыняр татым каласен кодем. Лач библиотекыште вашлиймаште писатель тидын нерген каласкален.

Павел Алексеевич профессийже дене инженер-моторостроитель улеш, Казань оласе авиационный институтым тунем лектын. Институт деч вара 1973 ийыште, распределений почеш, Омск оласе моторостроительный конструктор бюрошко пашашке логалеш. Тыште тудо авиационный двигатель-влакым испытатлен. Сылнымут деке тудо институтышто тунеммыж годым шӱмаҥын. Прозыштат, поэзийыштат шке вийжым терген. Творчество тудым тичмашнек авалтен да паша деч кӱрылтде тудо А.М. Горький лӱмеш Литературный институтыш тунемаш пурен, тудым 1999 ийыште тунем лектын. Публицистике ойлымаш, очерк, повесть-влакым Сибирьыште да Москваште лектын шогышо журналлаште савыктен. 90 ийлаште, кунам авиастроений элыштына «шуҥгалтын», тудо Омск оласе «Время» газетын тӱҥ редакторжо лийын тыршен. Кызыт адакат авиастроений отрасльыште тырша, кеч шукертак сулен налме канышыште улеш гынат.

Российысе писатель ушемыш Павел Алексеевичым 1991 ийыште пуртеныт. 90-шо ийлаште тудын кок историй романже – «Отпор» ден «Полуденный зной» – лектыныт. Нунылан тудо 2005 ийыште Д.Н. Мамин-Сибиряк лӱмеш Всероссийский литератур премийым налын.

Павел Алексеевич творческий планже нергенат каласкалыш. Кызыт архивлаште адмирал Колчак нерген материалым пога, родо-шочшыжо-влак полшымо дене шке тукымвожшым шымла.

Лудшо-влак дене вашлиймаш оҥай да поян лийын. Тыште тӱрлӧ теме нерген кутыреныт, политикымат ӧрдыжеш коден огытыл. Туддеч посна нигузе ок лий. Библиотекын лудмо залыштыже погынышо калык писательын политике нерген шонымашыжым палнеже улмаш. Чыла йодышланат Павел Алексеевич вик вашештен. Мутлан, шукерте огыл лекше историй дене кылдалтше фильм-влак нерген. Южгунам туге савырен шындат, кином умбакыже чылт ончымет ок шу. Чын, палемдыме историй факт-влак улыт. Сандене авторлан тудым импровизироватлаш ок кӱл, вет палыме факт-влакым нигузе ондален каласаш ок лий. Павел Алексеевичын произведенийлаштыже тыгай уке.