Келтейыште Шорыкйол пайрем эртен

7 январьыште ялысе Культура пӧртыштӧ кугырак тукым погынен. Ий еда ме У ий паремым эртарена, а пенсионер-влакын чумыргымышт поро йӱлашке пурен. Пайремыш тӱҥ шотышто ӱдырамаш-влак толыныт да пеленышт ӱстелыш сийым конденыт.

Пырля погынен чайым йӱын шинченыт, кенета Коля, 2020 ийын символжо толын пурен. Тудо чылаштымат пайрем дене саламлен, тазалыкым, улан илышым тыланен. «Чодраште шочын изи кож» муро дене Йӱштӧ Кугыза ден Лумӱдыр толыныт. Лумӱдыр почеламут да муро весела конкурсым эртарен. Илтубаева Рита У ийысе мурым йоҥгалтарыш, тудым эше школ жап гыч сай шарна. Пасетова Татьяна руш мурым мурыш.

Шамтиева Венера чылаштымат ӧрыктарыш. Тудо кум почеламутым лудын пуыш. Изимариева Рита «Чодраште шочын изи кож» мурым у семын возымым йоҥгалтарыш. Чыланат Лумӱдыр деч приз ден конфетке-влакым налыныт. Теве Йӱштӧ Кугыза ден Лумӱдырланат корныш тарванаш жап толын шуо, нунын шушаш ий марте ужатышт. Вара чыланат пырля ӱстел воктеке шинчын чайым йӱна, руш да марий муро-влакым йоҥгалтарышна, куштышна.

М. Ислаева, Келтей ял библиотекын вӱдышӧ библиотекарьже.