Кремльыште У ийысе елка – Российысе икшыве-влакын тыланымашышт

Кремль елкыш кайыме нерген каласымеке, мый моткоч ӧрым, тиде мыланем у ийысе сюрприз лийын. 23 декабрьыште Уфа олаште Башкортостан Республикын тӱрлӧ ола ден районлаж гыч 114 ӱдыр ден эрге чумырген. Тыште мыят нунын дене палыме лийым.

24 декабрьыште ме Москва олашке чоҥештышна. Рӱдолаш толын шумеке, мемнам «Измайловский» унагудо комплексыш вераҥдышт, тыште Йӱштӧ Кугыза ден Лумӱдыр куанен вашлийыч. Вара «Измайловский Кремльыш» экскурсий дене кайышна, тыште елка модыш-влакым оформитлыме шотышто мастер-классыште лийна да шке творческий мастарлыкнам текшырышна.

25 декабрьыште Москваште У ийысе каникулнан ик эн тӱҥ событийже лие – Кугыжаныш Кремль Полатыште Кремльысе елко. Эрдене ятыр автобус колонно дене мемнан тӱшкана Кремль полатыш тарваныш. Автобус тӧрза гыч пайрем шӱлыш коеш, ояр гирлянде-влак йӱлат, кугу Москва ола. Кайымына годым ме рӱдолан тӱҥ да шуко достопримечательностьшым ужна. Тиде Кремль площадьыште мотор кугу кож, тудо тӱрлӧ деч тӱрлӧ модыш-влак дене сӧрастаралтын.

Полатыште У ийысе бал йомакысе персонаж-влак дене вашлиймаш гыч тӱҥале. Вара представлений моткоч кугу залыште умбакыже шуйныш. Тудо талантан да ушан-шотан, тунеммашын отличникше да олимпиадышлаште сеҥыше 5 тӱжем утла ӱдыр ден эргым иктыш чумырен. Ме «Письмо Деду Морозу» спектакльым ончышна. Представлений мийыме годым Йӱштӧ Кугыза чыла икшывым У ий дене саламлыш да шере приз ден пӧлек-влакым кучыктыш.

Кремль елкыш миен толаш полшымылан кугу таум каласем. Тиде мыйын йӧратыме школлан, туныктышо, музыкаль школын туныктышыжо-влаклан. А Российысе тӱҥ У ий елкышто лияш – тиде кугу сюрприз да куан! Тек тиде юзо виян елкышто элнан кажне икшывыже лийже манын тыланыме шуэш.

В. Вахитова,

1 №-ан Калтаса КШ-ын 7 А классыште тунемшыже.