Мишкан села финно-угор тӱнян рӱдерже лийын

Тиде кугу пайремыште мемнан район артист-влакат участвоватленыт

6 январьыште Мишкан селаште «Культурная столица финно-угорского мира» символым пуымаш эртен. Шулдыран кайыкым, мифысе Кугавам (Праматерь), Мишкан ялсовет администраций вуйлатыше Рустам Ишмакаевлан кучыктымо. Тыште тудо идалык мучко аралалташ тӱҥалеш.

Пайремышке республикынан тӱрлӧ районжо, Удмуртий, Марий Эл Республикыла, официальный делегат, тыгак йот элла гычат уна-влак толыныт. Кажне ийын эллаште, кушто финно-угор калык ила, культура рӱдолам ойырен налыт. Кодший тыгай рӱдолалан Российысе, Мишкан села шотлалтын. Идалык мучко районышто тӱрлӧ элла гыч вич тӱжем утла туристым вучат.

Тыгай статусым налмеке, финно-угор тӱнян рӱдолаштыже тӱрлӧ мероприятий эртаралтшаш, нунышт калыкын йӱлажым да культурыжым арален кодымаш дене кылдалтшаш улыт. Тений Мишкан районышто тӱрлӧ событий эртышаш, нунын коклаште карнавал, фестиваль, таҥасымаш ден конкурс-влак. Тений кеҥежым тыште «Край утренней зари» пайремым эртараш шонат да йот элла гыч тӱжем дене унам вучат.

Тиде кугу мероприятийыште мемнан район гычат коллектив-влак участвоватленыт. Тиде – Сылвий ял гыч «Райдем-райдем» фольклор ансамль, Кӱшыл Тиктем ял гыч «Ингур» удмурт фольклор ансамбль, Кугу Агытан ял гыч «Марий кумыл» фольклор коллектив да Калтаса села гыч Лилия Матвеева. Пайремын тӱҥ ужашыштыже Мишкан селам негызлыме нерген театр представлений семын ончыктеныт, башкир мландыште верланыше оҥай марий села дене палдареныт.

БР-се культура министрын икымше алмаштышыже Наталья Лапшина, РФ Кугыжаныш Погынын депутатше, Российысе Параолимпийский комитетын вице-президентше Рима Баталова, БР-се Калык келшымаш пӧртын директоржо Ильгиз Султанмуратов, «Ассамблея финно-угорских народов Республики Башкортостан» мер организацийын Региональ ушемжын вуйлатышыже, «Мордовский национально-культурный центр Республики Башкортостан» мер организацийын региональ исполкомжын вуйлатышыже Юлия Герасимова, «Обиница – культурная столица финно-угорского мира 2015» (Эстоний) проектын вуйлатышыже Риека Хырн пайремын сулло унаже-влак лийыныт. Кугу пайрем концерт калык творчествын моторлыкшо да талантше дене ӧрыктарен да куандарен. Кажне концерт номерым калык совым рӱж кырен вашлийын, артист-влак дене пырля мурен-куштеныт. Концерт йӱлашкак пурышо кандыра дене мучашлалтын.

– Сценыште выступатлыме деч вара мемнам «Шорыкйол» йӱла пайремышке ӱжыч, тудыжо Кӱрзе ялыште эртен, – каласкалат мемнан районысо артист-влак. – Уна-влакым нуно шокшо мелна да калык муро дене вашлийыныт. Культура пашаеҥ-влак дене пырля нуно Мишкан районышто «Шорыкйол» йӱла пайремым кузе эртарымым ончыктеныт. Пайрем верысе СДК-те эртен. Йӱла почеш кажнылан пӧлекым кучыктеныт. Уло кумылын тыгай чапле пайремым ончыктымыланда кугу тау.

МЕМНАН СПРАВКЕ: «Культурная столица финно-угорского мира» – МАФУН (Молодежная Ассоциация Финно-Угорских Народов) ден «Центр развития коренных народов URALIC» НКО-ын пырля ыштыме программышт. Тудо тӱп урал калыкым да тудын йылмыжым палдараш да тудым вияҥдаш, тыгак тӱнясе финно-угор регион-влакым вияҥдымашке виктаралтын. Тачысе кечылан финно-угор тӱнян рӱдолаже титулым шым ял ден олалан пуымо: 2014 ийыште Быги удмурт яллан, 2015 ийыште Обиница эстон яллан, 2016 ийыште венгр Искасентдёрд ял ден Веспрем олалан, 2017 ийыште Вокнаволок карел яллан, 2018 ийыште Шоруньжа марий яллан да 2019 ийыште Мишкан башкир селалан.