У корныш савырнаш жап

Високосный ийыште икымше йӱр йымак логалаш – пиаллан да сеҥымашлан

29 февральыште шочшо-влаклан талант пуалтеш – айдеме тукымым молан-гынат туныкташ, чын корным ончыкташ. Ожно тыгай еҥ-влакым араленыт, нунылан эҥертеныт да полшеныт.

Ты йӱдым чыным ончыктышо омо-влак кончат, нуно иктаж-мо нерген шижтарат. Но тидлан 00 шагатат 01 минутлан малаш вочман. Воктенда ала-кӧ улмым шижыда гын, лӱдман огыл. 29 февральыште талисманым налаш сай. Нуно кеч-кунамат полшаш тӱҥалыт. Кеч-могай сатум налмат аралыше виян лиеш да вий-куатым ешара.

Кум ий ик корно дене каена, но високосный ий шуэшат, у корныш савырнышаш, шке илышым иктешлышаш, кӱсыным пӧртылтышаш улына. А кӧ палыдыме деч лӱдын, нимом вашталташ огеш тырше гын, тугак верыште тошкышташ тӱҥалеш да тошто нелылык-влак дене уэш да уэш тӱкна. Шке илышым кеч-кунам вашталташ огеш лий. Тидым лач високосный ийыште ыштыман. Тудо мыланна шке илышым умылаш, утыж деч кораҥаш, йоҥылышым тӧрлаш, ончыкылыклан планым ышташ пуалтеш. Сандене чарыме пале-влакат улыт. Тидыже шке энергетикым лавыртыме деч аралаш полша.

Високосный ий – у шинчымашым налаш, илышыште ала-мом умылаш, чоным почаш жап. Високосный ий илыш корно гыч утыжым, радам дене эрташ мешайыше чаракым ӱштылеш. Сандене чон кӧргӧ поянлыкна нерген шоналтыман. Тидым огына ыште, а материальный шӧрын нерген гына шонаш тӱҥалына гын, нелылык-влак лектыт, туткар-влак лийыт. Високосный ий шонаш тарата. Сандене жапым ида йомдаре, илышдам сай могырыш вашталташ тыршыза, уке гын ты ий тидым тендан олмеш ышта, а тудын ыштыме вашталтыш эрежак огеш куандаре.

Високосный ыште огеш лий:

Чоҥымо пашалан пижаш;

Кугу оксам кӱсынеш налаш;

Кужу жаплан суртым коден каяш;

Лӱмым, фамилийым вашталташ;

Ушкалым ужалаш;

Вес верыш илаш куснаш;

У тылзыште ӱпым пӱчкаш;

Азалан ача-аван лӱмыштым пуаш;

Азалан чызым пукшымым чарнаш.