Январь

Кече ынде эркын-эркын кужем шога, а йӱд – туртеш.

Тыгеже, кавасе тыртыш кече ден мемнан илыме мланде олян-олян лишемыт.

Чодыраште тыгай годымат ӱшык. Садланак «Чодыра – ик ужга» – маныт калыкыште. Тушто тыгак кайык-влакын йӱк-йӱанышт пылышлан ок шокто. Нуно ӱшык верлаште йымен шинчат. Шогал колыштатат уло пӱртӱс ден чыла чонан пеҥгыде омо дене мален колтымо гай чучеш. Мо-гынат, ялт тыгак огыл: «Йӱштӧ кугыза» оралте пырняла ден пушеҥгылам шолт да шолт пералтен, телылан оза улмыжым шиждаренак шижтара.

Мо вара, тек тудо шкенжын праваже дене пайдалана. Ме гын «Йӱштӧ кугызан» йӱштӧ кидшымат шокшын кормыжтена.

Мутат уке, вет теле йӱштє деч виянрак вес вият уло. Вараже тудо, вес вийже, садак январьысе чатлама йӱштым сеҥа. Нимо деч утларак виянже – айдеме. Тудо у ийыште у пиалым тапта.