Калтаса ужара
+18 °С
Пылан
Все новости
Новости
17 шорыкйол 2020, 21:58

Райрӱдӧ Культура пӧртыштӧ оборудоватлыме фитнес зал шке омсажым почеш

Мемнан райрӱдыштӧ ныл тӱжем утла еҥ ила. Нунын кокла гыч шукыжо – самырык еҥ-влак. Лач нунылан чыла тиде ышташ тыршалтеш.
Шукерте огыл уэмдыме райрӱдӧ Культура пӧртыштӧ тачысе кечылан тӱрлӧ велан латкум клубный формирований пашам ышта. А ындыжым эше арнялан кум гана, чыла тыланыше-влаклан, фитнес залым почмо лиеш. Нунын дене занятийым тӱнямбал классан спорт мастер, чумыр зачетышто Европо Кубокын бронзо призержо да Европо кубок-влакын шуко гана лийше призержо, бобслей дене Россий сборный командыште улшо Иван Линючев эртараш тӱҥалеш.
– Тыште таза да мотор лияш чыла условият уло, – ойла Иван Игоревич. – Тӱҥжӧ – нунын тыланымашышт, тугеже зал яра шогаш ок тӱҥал.
Чыланат ме шарнена, уэмдыме Культура пӧртын почылтмыжым кужу жап вучышна. Ындыжым тудо кугу пашам ышта. Олмыктымо деч ончыч тиде пӧлем спортзал лийын, тыште селаште илыше калык волейбол дене модаш чумырген. Ындыжым тыште кумло утла тренажерым вераҥдыме. Тренажер оборудований дене фитнес залым Башкортостан Республике бюджет гыч оксам ойырымылан кӧра почмо, а тудыжо «Реновация муниципальных учреждений культуры» направлений почеш культура сфера учреждений-влакым вияҥдыме шотышто пашалан ойырымо лийын.
– Кызытсе жаплан 29 тренажерым вераҥдыме, нунышт чыла тӱрлӧ чогашылым вияҥдаш да пеҥгыдемдаш полшат, – ойла Иван Линючев. – Тиде йол, кид, туп, оҥ чогашыл-влак. Тидлан мый посетитель-влаклан нунын дене кузе пашам ышташ тӱҥалме нерген умылтараш тӱҥалам. Тыланымашда уло гын, персональный тренировкылан программым ыштем. Ӱдыр-влаклан тыште тыгай тренажер-влак лийыт: куржмо корно, степ-аэробика, велотренажер-влак.
Чын, залым оласе южик фитнес рӱдер деч сайрак куралаҥдыме. Тушко абонемент дене толаш тӱҥалман. Фитнес залыште тӱрлӧ ийготан еҥ-влаклан тренажерым муаш лиеш. Ындыжым селаштат яра жапым пайдалын эртараш лиеш.
Ушештарена, 18 январьыште 11.00 шагатеш фитнес-тренер Иван Линючев калтасамытым райрӱдӧ Культура пӧртын спортзалыштыже вуча. Тыште тудо мастер-классым ончыкта да фитнес тренировко нерген ойла. Толза, спорт дене кылым кучыза, таза кап-кылан да мотор лийза.