Калтаса ужара
+20 °С
Пылан
Все новости
Новости
18 шорыкйол 2020, 20:46

Васола ял гыч увер-влак

Кӧ морозильный ларьым модын налын
Иза-шольо Кугубаевмыт – Вячеслав ден Станислав, шочмо ялыште эртарыме кеч-могай мероприятийым эртарашлан оксам ойырат.
Тений У ийысе тӱҥ лоторей призлан нуно «Леран» морозильный ларьым налыныт. Тидын нерген увер пеш вашке шарлен. Билет-влакым васоламыт деч посна пошкудо ял калыкат: Калмиямучаш, Павасола, Шоръял – налыныт.
Туге гынат, тӱҥ призым Васола ялыштак илыше Егорова модын налын.
Шорыкйол мунчалтымаш
У ий ден Шорыкйол пайрем-влакым ий мучко шарнен илаш манын, Васола ял калык Марий Эл Республике гыч палыме артист-влакым ӱжын.
Унамыт лӱмеш нуно Васола ялын ик эн кӱкшӧ курыкшо гыч Шорыкйол мунчалтымашым эртареныт. Мунчалтыме курыкын кужытшо 400-500 метр.
Самырык еҥ ден йоча-влак уло кумылын мунчалтеныт, а илалше-влак курык йымалне костерым ылыжтеныт, ӱстелым шареныт, самоварым шынденыт да гармонь почеш кандырам пуненыт. Мо оҥай, тыште ик йӱшӧ еҥат лийын огыл.
Пайремышке тыгак ялыште ик эн пагалыме еҥ – Тимирбай Тимиршинат – толын. Тудлан 85 ий.
Теве молан, очыни, Васола ялыште спортсмен-влак да кужу ӱмырым илыше-влак шуко улыт.
Йоча-влаклан пайремым эртареныт
Васола ялыште илыше Радислав Зайнетдиноват поро пашам ятыр ыштен. 90-шо ийлаште тудо «Дружба» колхозым вуйлатен.
У ий пайремлаште шке оралтыж ончылно кугу гына лум олам нӧлтен шынден. Тыште тӱҥ герой-влак, конешне, марий йомакла гыч персонаж-влак лийыныт. Район комиссият Радиславын пашажым кӱкшын аклен да тудлан ик ончыл верым пуэн.
У ий каникул жапыште тудо ялысе йоча-влакым ӱжын да нунылан пайремым эртарен. Программыште тӱрлӧ модмаш, таҥасымаш лийыныт. Чыла участниклан тудо шере призым ямдылен.
Васола ял Сеҥымашлан 75 ий лӱмеш пайремлан ямдылалтеш
Радислав Зайнетдинов кугу датылан – Совет калыкын немыч тушманым сеҥымыжлан 75 ий темме лӱмеш Сеҥымашлан ямдылалтеш.
Тиде гана Радислав Бессмертный полкым организоватлаш шона. Тудо Васола ял гыч Кугу Отечественный сарын участникше-влакын 40 утла фотографийыштым поген. Тудым ик баннерыш ушынеже, а эн покшелне Калит Гареевын, тудо Берлиным штурмоватлымаште лийын, Богдан Хмельницкий орденын кавалерже, фотожым вераҥдынеже. Баннер урем кужыт лиеш. Кугарнян, марий картын сугыньжо деч вара, Нефтекамск олашке баннерым заказатлаш каен.